46.277 ლარი საახალწლო ღონისძიებებისთვის – ტენდერი ‘კეთილმოწყობის’ თანამშრომელმა მოიგო

საახალწლოდ წელსაც ამ ხეს მორთავენ

ახალციხის ქუჩების მორთვა საახალწლოდ უკვე დაიწყო. თუ გასულ წლებში, რამდენიმე წელიწადი ზედიზედ, ქალაქის საახალწლო ელფერზე შპს „კეთილმოწყობა“ ზრუნავდა, ბოლო ორი წელია ტენდერს მისი ყოფილი დირექტორი და ამჟამად რიგითი თანამშრომელი, ინდივიდუალურ მეწარმედ დარეგისტრირებული ამირან ნოზაძე იგებს. ნოზაძეს ტენდერში კონკურენტი არ ჰყავდა.

ინდ მეწარმე „ამირან ნოზაძე“ სამუშაოებს 46.277 ლარად შეასრულებს. ქალაქში წელსაც მესხეთის თეატრის წინ მდგარ ბუნებრივ ხეს მორთავენ.

„ქუჩებში ახალ მანათობელ კონსტრუქციებს დავაყენებთ. მორთვა 25 დეკემბერს უნდა დავასრულოთ. ამ დღესვე მოირთვება ნაძვის ხეც, რომელსაც დაცვას დავუყენებთ“, – ამბობს ამირან ნოზაძე.

იგი გვიხსნის, რომ ინდივიდუალურ მეწარმედ ოთხი წლის წინ დარეგისტრირდა, მართალია ეს მისი მხოლოდ მეორე ტენდერია, მაგრამ მსგავსი სამუშაოების გამოცდილება აქვს: „მანამდეც მიწევდა მსგავსი სამუშაოების შესრულება, როდესაც „კეთილმოწყობის ხელმძღვანელი ვიყავი“.

აღსანიშნავია, რომ ნოზაძეს წინა ტენდერიც გასულ წელს ამ დროს და ისევ ქალაქის მორთვაზე აქვს მოგებული.

ამირან ნოზაძე შპს „კეთილმოწყობის“ ხელმძღვანელად 2003 წლიდან 2014 წლის 29 ივლისამდე მუშაობდა. ამ დროიდან დღემდე ამავე სამსახურის სპეციალისტია.

ტენდერის პირობების თანახმად, ამ თანხაში შედის საჩუქრების შეძენა ახალციხის მეშვიდე სკოლის 31 მოსწავლისთვის. მათ მერია 28 დეკემბერს ესტუმრება. ასევე საჩუქრების შეძენა იმ პატარებისთვის, რომლებისთვისაც 31 დეკემბერს, შუადღეს, ახალციხის ცენტრში საახალწლო წარმოდგენაც გაიმართება. ამ პატარებს 31 დეკემბერს, 18:00 საათზე დაასაჩუქრებენ. მერიაში განმარტავენ, რომ საჩუქრებს 500 ბავშვისთვის გაამზადებენ.

[თინათინ ზაზაძე, ახალციხე]