'ნაციონალებმა' სამცხე–ჯავახეთის მაჟორიტარები დაასახელეს

კონფერენციაზე, რომელიც დღეს, ახალციხეში გაიმართა, განმარტეს, რომ ადიგენისა და ახალციხის მაჟორიტარობის კანდიდატი ვაჟა ჩიტაშვილი იქნება; ახალქალაქის ხუთი სოფელის ( აზავრეთი, კოჭიო, პტენა, ბარალეთი, და ჩუნჩხა) ასპინძასა და ბორჯომის სახელით კი ტარიელ ლონდარიძე იბრძოლებს. ორივე მათგანი მოქმედი მაჟორიტარები არიან. ჩიტაშვილიც და ლონდარიძეც საპარლამენტო უმცირესობას წარმოადგენენ. ამ ეტაპზე, ვაჟა ჩიტაშვილი პარლამენტში ახალციხის, ტარიელ ლონდარიძე კი ასპინძის ინტერესებს იცავს.

როგორც პარტიაში ამბობენ, ახალქალაქის დანარჩენი ნაწილისა და ნინოწმინდის მაჟორიტარობის კანდიდატად სამველ პეტროსიანი განიხილება. თუმცა, ჯერ ეს საკითხი გადაწყვეტილი არ არის. პარტია თავად პეტროსიანის გადაწყვეტილებას ელოდება. ჩიტაშვილისა და ლონდარიძის მსგავსად, სამველ პეტროსიანიც საპარლამენტო უმცირესობის წევრია.

დღესვე დასახელდნენ სიის წევრები. "ერთიანი ნაციონალური მოძრაობის" საპარლამენტო სიაში იქნებიან: ზურაბ ჩილინგარაშვილი, გევორქ შუშანიანი და ბესიკ ბექაური.

კონფერენციას, რომელიც დღეს, 10 მაისს, ახალციხის ოფისში გაიმართა, სამცხე-ჯავახეთის რეგიონის დელეგატები, მოქმედი მაჟორიტარები და ასევე, "ერთიანი ნაციონალური მოძრაობის“ ერთ–ერთი ლიდერი მიხეილ მაჭავარიანი ესწრებოდნენ.

შეგახსენებთ, თუ აქამდე სამცხე–ჯავახეთის მუნიციპალიტეტებს, ახალციხეს, ადიგენს, ასპინძას, ბორჯომს, ნინოწმინდასა და ახალქალაქს, პარლამენტში თითო დეპუტატი ჰყავდათ, ახალი მოწვევის პარლამენტში რეგიონის სახელით მხოლოდ სამი მაჟორიტარი შევა. ახალციხე და ადიგენი ერთ საარჩევნო ოლქად გაერთიანდა; საერთო დეპუტატი ეყოლებათ ახალქალაქსა და ნინოწმინდასაც, თუმცა, ახალქალაქი ნინოწმინდას ხუთი სოფლის გარეშე მიუერთდა; ახალქალაქის ხუთი სოფელი ( აზავრეთი, კოჭიო, პტენა, ბარალეთი, და ჩუნჩხა) კი ასპინძასა და ბორჯომთან გააერთიანეს;



[ნინო ნარიმანიშვილი, ახალციხე]