'ნაციონალურმა მოძრაობამ' მაჟორიტარების დასახელება სამცხე–ჯავახეთიდან დაიწყო

მაჟორიტარობის კანდიდატები

„ერთიანი ნაციონალური მოძრაობის“ კონფერენციას, რომელზეც მაჟორიტარი დეპუტატების კანდიდატები შეირჩა, პარტიის ერთ–ერთი ლიდერი მიხეილ მჭავარიანი ესწრებოდა.

"სამცხე–ჯავახეთი პირველი რეგიონია სადაც ღიად გამოვაცხადეთ კანდიდატები, იმიტომ რომ შედარებით ადრე ჩამოვყალიბდით. აქ ძალიან კარგი გუნდი გვყავს“, – განაცხადა მაჭავარიანმა.

ადიგენისა და ახალციხის მაჟორიტარობის კანდიდატი ვაჟა ჩიტაშვილი იქნება; ახალქალაქის ხუთი სოფლის ( აზავრეთი, კოჭიო, პტენა, ბარალეთი, და ჩუნჩხა) ასპინძისა და ბორჯომის – ტარიელ ლონდარიძე . ორივე მათგანი მოქმედი მაჟორიტარები არიან.

რაც შეეხება ახალქალაქს და ნინოწმინდას, აქ დეპუტატად სამველ პეტროსიანის კანდიდატურა განიხილება. თუმცა ჯერ საკითხი გადაწყვეტილი არ არის.

„სამ დღეში გაირკვევა. სამველ პეტროსიანი ფიქრობს იყაროს თუ არა კენჭი და ჩვენ გვჭირდება მისი საბოლოო გადაწყვეტილება“, – ამბობს მიხეილ მაჭავარიანი.

მისივე თქმით, „ქართული ოცნება“ მუნიციპალიტეტების ასე დაყოფით ამტკიცებს, რომ არა ხალხზე, არამედ მხოლოდ თავის სკამებზე ზრუნავს.

„ისე დაჩეხა და გააერთიანა რაიონები, რომ ვერ გაიგებთ ვინ არის თქვენი დეპუტატი. ბორჯომი, ასპინძა და ახალქალაქის ნაწილი გააერთიანეს, წარმოიდგინეთ, დეპუტატმა სად უნდა გამართოს შეხვედრები?!. ჩვენ შევდივართ ამ ბრძოლაში, მიუხედავად იმისა, რომ პარლამენტში გაჩნდა რესურსი, რომ კანონი შევცვალოთ, ჩვენ მაინც ვემაზდებით ამ სისტემით არჩევნებისთვის“, – განაცხადა პარტიის ერთ–ერთმა ლიდერმა.

პარტიას უკვე შერჩული ჰყავს სიის წევრებიც.

„სამი ადგილი ეკუთვნის სამცხე–ჯავახეთს და კონფერენციაზე დასახელდა კანდიდატები. 17 მაისს, თბილისში იქნება სიის პრეზენტაცია“, – განაცხადა ადიგენის მაჟორიტარმა დეპუტატმა ზურაბ ჩილინგარაშვილმა.

პარტიულ სიაში: ზურაბ ჩილინგარაშვილი, გევორქ შუშანიანი და ბესიკ ბექაური იქნებიან.

"ნაციონალური მოძრაობა" აქტიურ წინასაარჩევნო კამპანიას ივნისის დასაწყისშივე დაიწყებს. დღეს გახდა ცნობილი, რომ საპარლამენტო არჩევნების ოფიციალური კამპანია 8 ივნისს დაიწყება.



[თინათინ ზაზაძე, ახალციხე]