ასპინძის, ბორჯომისა და ახალქალაქის ხმებისთვის ‘ნაციონალებიდან’ ტარიელ ლონდარიძე იბრძოლებს

ასპინძისა და ბორჯომის, ასევე ახალქალაქის ხუთი სოფლის (აზავრეთი, კოჭიო, პტენა, ბარალეთი, და ჩუნჩხა) მაჟორიტარობის კანდიდატად ტარიელ ლონდარიძე ვარძიაში წარადგინეს.

„ნაციონალური მოძრაობის“ ლიდერების შემდეგ შეკრებილ მხარდამჭერებს ტარიელ მონდარიძემ მიმართა. ლონდარიძეს იმედი აქვს, რომ ისე გაიმარჯვებს ბორჯომსა და ახალქალაქის სოფლებში ახლა, როგორც ეს 2012 წლის საპარლამენტო არჩევნებზე, ასპინძაში შეძლო.

„დღევანდელმა მთავრობამ საარჩევნო ოლქები მთლიანად დაჩეხა. მიუხედავად მათი ხრიკებისა, ჩვენ მაინც მოვახერხებთ გამარჯვებას და სქართველოს გათავისუფლებას რუსი ოლიგარქის ბატონობისაგან“, – განაცხადა ლონდარიძემ.

ვარძიაში, ღია ცის ქვეშ შეკრებილ მხარდამჭერებს მიმათა „ნაციონალური მოძრაობის“ ახალმა წევრმა სერგი კაპანაძემაც: „ვიცით, რომ ხელისუფლება ყველაფერზე წამსვლელია, თუმცა ჩვენ წყნარად და მშვიდად ვიმოქმედებთ და ამ ბრძოლას მივიყვანთ გამარჯვებამდე. ეს არის ერთადერთი გზა 4 წლის განმავლობაში დაპაუზებული საქართველო ამოქმედდეს“.

ტარიელ ლონდარიძის წარდგენას ასპინძის, ბორჯომისა და ახალქალაქის მცხოვრებლები ესწრებოდნენ.

„არ ვიცი რა მიზეზით, მაგრამ ჩვენმა ხელისუფლებამ ოლქები ასე დაგვიყო. მიუხედავად იმისა, რომ ჩვენი კანდიდატი ასპინძელია, მას ბორჯომშიც ბევრი იცნობს და ვიმედოვნებთ, რომ ჩვენს იმედებს გაამართლებს“, – გვითხრა ბორჯომის მკვიდრმა ვახტანგ ქვატაძემ.

ტარიელ ლონდარიძე „ნაციონალური მოძრაობიდან“ ბოლო ოთხი წელია პარლამენტში ასპიმძას წარმოადგენს.

შეგახსენებთ, რომ დღეს „ნაციონალური მოძრაობის“ ლიდერებმა დავით ბაქრაძემ, ნიკა მელიამ, ასევე პარტიის ახალმა სახეებმა ოთარ კახიძემ და სერგი კაპანაძემ, სამცხე–ჯავახეთში, ორი მაჟორიტარი წარადგინეს. ადიგენსა და ახალციხეში ვაჟა ჩიტაშვილი და ასპინძაში, ბორჯომსა და ახალქალაქის ნაწილში ტარიელ ლონდარიძე.

რაც შეეხება ნინოწმინდასა და ახალქალაქის დარჩენილ ნაწილს, ვინ იქნება აქ მაჟორიტარობის კანდიდატი, ჯერ უცნობია.

[ლუბა გიორგაძე, ასპინძა]