‘ნაციონალებმა’ ახალქალაქსა და ნინოწმინდაში მაჟორიტარი შეარჩიეს

პარტიის კანდიდატი არსენ კარაპეტიანი იქნება. იგი ახალქალაქის მკვიდრია. როგორც „ნაციონალურ მოძრაობაში“ ამბობენ, წლების განმავლობაში კარაპეტიანი ძალოვან სტრუქტურაში მუშაობდა. წინა ხელისუფლების დროს, 2012 წლამდე, იყო ნინოწმინდის რაიონული სამმართველოს უფროსი.

„ასეთი პატრიოტი ადამიანი ჯერ არ შემხვედრია“, – ასე ახასიათებს კანდიდატს ახალციხისა და ადიგენის მაჟორიტარი დეპუტატობის კანდიდატი ვაჟა ჩიტაშვილი.

პარტიაში განმარტავენ, რომ კანდიდატს ამომრჩევლის წინაშე, ოფიციალურად, 14 ივლისს წარადგენენ.

შეგახსენებთ, „ნაციონალურმა მოძრაობამ“ სამცხე-ჯავახეთის ორ საარჩევნო ოლქში: ახალციხე-ადიგენსა და ასპინძა-ბორჯომის, ასევე ახალქალაქის ხუთ სოფელში (აზავრეთი, კოჭიო, პტენა, ბარალეთი, და ჩუნჩხა) მაჟორიტარობის კანდიდატები 11 ივნისს დასახელა. ახალციხე-ადიგენის ოლქში კანდიდატი ვაჟა ჩიტაშვილია, ასპინძა-ბორჯომისა და ახალქალაქის ნაწილში კი ტარიელ ლონდარიძე.

2016 წლის საპარლამენტო არჩევნები 8 ოქტომბერსაა დანიშნული. რეგიონში მაჟორიტარობის კანდიდატები ჯერ მხოლოდ „ნაციონალურ მოძრაობას“ ჰყავს დასახელებული.

[ლუბა გიორგაძე, ახალქალაქი]