სად გავაჩეროთ მანქანა – პროტესტი რუსთაველზე

ახალციხის მერიის გადაწყვეტილებით, რამდენიმე დღის წინ, ახალციხეში, რუსთაველისა და სულხან–საბას ქუჩების მიმდებარე ტერიტორიაზე საპარკინგე ადგილი გაუქმდა. ამ ადგილას „ავერსის“ აფთიაქი, არასამთავრობო ორგანიზაცია „ტოლერანტი“, სამკერვალო სალონი, ღვინის მარანი, სარეაბილიტაციო ცენტრი და კარდიოლოგიური კლინიკაა. ყველა ამ დაწესებულების მეპატრონემ, პარკინგის აკრძალვის შესახებ დღეს შეიტყო და პროტესტს ნიშნად ქუჩაში გამოვიდა.

მათი ნაწილი ამბობს, რომ ასე ისინი მომხმარებლებს კარგავენ.

„ისე აკრძალეს, არ გაგვაფრთხილეს, მანქანებს აჯარიმებენ. ამ ქუჩაზე მანქანის გასაჩერებელი ადგილის გაუქმებას ვერ შევეგუებით, რეალიზაცია ჩავარდება“, – ამბობს „ავერსის“ მენეჯერი ფიქრია მათოშვილი.



შემთხვევის ადგილზე საპატრულო პოლიციის სამცხე-ჯავახეთის მთავარი სამმართველოს უფროსი, მისი მოადგილე და ახალციხის მერის მოადგილე ზაზა გელაძე მივიდნენ.

მერის მოადგილემ მოსახლეობას პროეტესტის მიზეზი დაუწუნა: „რას დგახართ აქ და ლაპარკობთ?! თქვენი მომხმარებელი გინდათ რომ კარებთან გაგიჩერდეთ? ვერ გაგიჩერდებათ აფთიაქის კარებთან მანქანა“.

ზაზა გელაძემ საპარკინგე ადგილის გაუქმება ობიექტების მეპატრონეების უსაფრთხოებით ახსნა.

„მოსახლეობამ არაერთხელ მოგვმართა ამის შესახებ“, – განაცხადა მერის მოადგილემ და აქვე ობიექტების მეპატრონეებს ურჩია, მანქანით მოძრაობას ფეხით სიარული არჩიონ, – „სად ცხოვრობთ? მანქანით რატო მოდიხართ? ფეხით ვერ მოხვალთ?“

რუსთაველის ქუჩაზე შეკრებილები ამბობდნენ, რომ საპარკინგე ადგილის გაუქმება და მოსახლეობის დაჯარიმება მიზანმიმართული იყო. ამაზე საპატრულო პოლიციის უფროსმა განაცხადა, რომ მათი ერთადერთი მოტივაცია მოსახლეობის უსაფრთხოდ გადაადგილებაა.



შინაგან საქმეთა სამინისტროში „სამხრეთის კარიბჭეს“ განუმარტეს, რომ ქალაქის ამ ნაწილშიავტომანქანის გაჩერების ამკრძალავი ნიშანი ახალციხის მერიის მოთხოვნის საფუძველზე დაამონტაჟეს.

„სამხრეთის კარიბჭე“ შეეცადა მერის მოადგილესთან გაერკვია, ვინ და როდის მოითხოვა გზის ამ მონაკვეთზე გაჩერების აკრძალვა, თუმცა, ზაზა გელაძემ კომენტარისთვის ვერ მოიცალა: „ვლაპარაკობ, ხომ ხედავთ არაა?! უნდა წავიდე, ამის გარდა ქვეყანა საქმე მაქვს“.

კონკრეტული ინფორმაციის მიღება ახალციხის მერიისგან ამის შემდეგაც არაერთხელ ვცადეთ, თუმცა, უშედეგოდ. საზოგადოებასთან ურთიერთობის სამსახურის წარმომადგენლებმა ხან სად გადაგვამისამართეს და ხან სად, რამდენიმე საათის შემდეგ კი „სამხრეთის კარიბჭეს“ სატელეფონო ზარებს აღარ უპასუხეს.

პროტესტიდან რამდენიმე საათში, ქალაქის მერიამ ფეისბუქის გვერდზე განცხადება გაავრცელა, რომელსაც უცვლელად გთავაზობთ:
„ქალაქ ახალციხეში, რუსთაველისა და სულხან-საბას ქუჩის გადაკვეთაზე არსებული საგზაო ნიშანი - "დგომა გაჩერება" - აკრძალულია დაიდგა. ქალაქ ახალციხის მერია აღნიშნულ საკითხთან დაკავშირებით განმარტებას აკეთებს . "დგომა გაჩერება" ნიშანის დადგმა სწორედ ავტოსატრანსპორტო საშუალებების შეუფერხებლად მოძრაობის მიზნით და მოსახლეობის უსაფრთხო გადაადგილებისათვის მოხდა. ადგილობრივ მოსახლეობამ ქალაქ ახალციხის მერიას არაერთხელ მოგვმართა თხოვნით, რომ გზა გადატვირთული იყო და ეს საფრთხეს წარმოადგენდა თითოეული მოქალაქისათვის. უახლოეს მომავალში აღნიშნულ ტერიტორიაზე საგზაო ნიშნების გადაადგილება მოხდება და გათვალისწინებული იქნება, როგორც მოქალაქეების, ასევე მიმდებარე ტერიტორიაზე არსებული ობიექტების მფლობელების მოთხოვნა“, –აღნიშნულია ქალაქის მერიის მიერ გავრცელებულ განცხადებაში (სტილი დაცულია).



[ვარლამ წიკლაური, ახალციხე]