ახალციხეში გორის ქუჩას მოაასფალტებენ, თუმცა მალევე აყრიან

გორის, ერევნისა და ფალიაშვილის ქუჩების სარეაბილიტაციო სამუშაობი შპს „მესხეთი ავტოგზამ“ უნდა შეასრულოს. კომპანიამ ტენდერი 526,537 ლარით მოიგო. ტენდერის მიხედვით, გამარჯვებულმა კომპანიამ ამ სამ ქუჩაზე სანიაღვრე არხები უნდა მოაწყოს და ასფალტის საფარი დააგოს.

გორის ქუჩაზე სამუშაოები ერთი კვირის წინ დაიწყო, თუმცა, გზის მოპირკეთებას მოსახლეობის პროტესტი მოჰყვა. გორის ქუჩის მცხოვრებლები ამბობენ, რომ მათ ქუჩაზე ჯერ წყლისა და საკანალიზაციო ქსელი უნდა მოეწესრიგებინათ და გზის სარებილიტაციო სამუშაობი შემდეგ დაეწყოთ.

ქუჩის მცხოვრებლები შიშობენ, რომ როდესაც ქუჩაზე მძიმე ტექნიკა დაიწყებს მოძრაობას, წყლისა და კანალიზაციის 40 წლის წინანდელი მილები მთლიანად დასკდება.

„ახლა ასფალტს აგებენ, მერე წყალს და კანალიზაციას გაგიკეთებთო. მერე ვინ გადათხრის ამ დაგებულ ასფალტს? არ ჯობია, რომ ჯერ საკანალიზაციო სისტემა და წყლის პრობლემა მოგვარდეს და მერე დაიწყონ გზის მოასფალტება? დამპალია მილები, დამპალი. აქ რომ „კატოკი“ გადაივლის დასატკეპნად, სულ დასკდება“,– აცხადებენ გორის ქუჩის მცხოვრებლები.

მოსახლეობა ამბობს, რომ აღნიშნული პრობლემის შესახებ მერიას არაერთხელ მიმართეს, თუმცა უშედეგოგ: „მერია წყალკანალში გვაგზავნის, წყალკანალი მერიაში. ვერაფერს გვაგებინებენ“.

რამდენიმე დღის წინ გორის ქუჩის მცხოვრებლები სამცხე–ჯავახეთის გუბერნატორს აკაკი მაჭუტაძეს შეხვდნენ. ამბობენ, რომ მხარის გუბერნატორი პრობლემის მოგვარებას დაჰპირდათ.

„გვითხრა გაგიკეთებთო. გადარეკა ვიღაცასთან, 10 დღეში გააკეთეთ და მერე დააგეთ ასფალტიო“,–ამბობს გუჯა ყურმაშვილი.
აკაკი მაჭუტაძე გორის ქუჩის მცხოვრებლებთან შეხვედრას მხარის გუბერნატრი ადასტურებს, თუმცა, მსგავს დაპირებას კატეგორულად უარყოფს.

დავუკავშირდი გაერთიანებული წყალმომარაგების კომპანიის რეგიონის მმართველს. განმიმარტა, რომ პროექტი მზადაა და რაღაც პერიოდში მოგვარდება პრობლემა, თუმცა როდის, არ ვიცი. ის, რომ 10 დღეში მოგვარდება ეს პრობლემა–მეთქი, არ მითქვამს“, – აცხადებს გუბერნატორი.

ახალციხის მერიაში აღნიშნულთან დაკავშირებით მოკლე კომენტარით იფარგლებიან.

„ჯერ განიხილება. ესაა მერიის კომენტარი“, – ამბობს ახალციხის მერიის საზოგადოებასთან ურთიერთობის სამსახურის წარმომადგენელი სალომე ანთიძე.

„გაერთიანებული წყალმომარაგების კომპანიაში“ „სამხრეთის კარიბჭეს“ განუმარტეს, რომ გორის ქუჩის საკანალიზაციო და წყლის სისტემის სარეაბილიტაციო სამუშაოების ჩასატარებლად პროექტი მზადაა, მაგრამ დაფინანსების მოლოდინშია. კოპანიაში ვერ აკონკრეტებენ როდის დაიწყება სამუშაოები.

ქალაქის მერია გორის ქუჩაზე გზის სარეაბილიტაციო სამუშაობის შეჩერებას არ გეგმავს. „გაერთიანებული წყალმომარაგების კომპანია“ კი ჯერ პროექტის დაფინანსების მოლოდინშია. მერია გორის ქუჩაზე ასფალტს დააგებს, თუმცა მალევე აიყრება, იმ მიზეზით, რომ საკანალიზაციო სისტემასა და წყლის მილებს რეაბილიტაცია ჩაუტარდეს.





[ვარლამ წიკლაური, ახალციხე]