მესხეთის ქუჩაზე კანალიზაციის მოუწესრიგებლობის გამო ანტისანიტარიის პრობლემა ისევ დგას

სამეზობლო დავის შესახებ „სამხრეთის კარიბჭემ“ ექვს ივნისს დაწერა. მესხეთის ქუჩის მცხოვრებლების თქმით, ბაღდასაროვების საკანალიზაციო სისტემა საერთო ეზოს ტბორავს და ირგვლივ ანტისანიტარიაა.

პრობლემაზე ბაღდასაროვებიც საუბრობდნენ. მათი განმარტებით, ფინანსური პრობლემების გამო, საკანალიზაციო სისტემას ვერ შეაკეთებდნენ: „მერიას არაერთხელ მივმართეთ, მაგრამ საკმარისად არ დაგვეხმარნენ, ვერც სახლის სახურავს და ვერც კანალიზაციას დახმარების გარეშე ვერ მოვაწესრიგებთ“, - ამბობს მიშა ბაღდასაროვი.

«გაერთიანებული წყალმომარაგების კომპანია» ეზოს მცხოვრებლებს საკანალიზაციო მილის მოწესრიგებას დაჰპირდა. კომპანიამ აქ ასი მეტრის სიგრძის მილი და საკანალიზაციო ჭა დაამონტაჟა, თუმცა უშედეგოდ.



მეზობლები ამბობენ, რომ პრობლემა ისევ მოუგვარებელია: „მილის შეცვლის შემდეგ, ისეთი სუნი აღარაა, თუმცა ფეკალიები ისევ გადმოდის ეზოში და დროის გასვლის შემდეგ, იგივე პრობლემა იქნება. ჩვენ ვითხოვდით, რომ საკანალიზაციო სისტემა სახლში მოუწესრიგონ ამ ოჯახს, რადგან თვითონ არ შეუძლიათ. იმედი გვქონდა, რომ ბაღდასაროვებს საკანალიზაციო სისტემას მოუწესრიგებდნენ, მაგრამ ასე არ მოხდა“, - ამბობს თამარ გოგოლაძე.

მერიაში განმარტავენ, რომ პრობლემა შეისწავლეს და მოსაგვარებლად წყალმომარაგების კომპანიასთან მილის დაყენების შესახებ იშუამდგომლეს: „მერიას არ ეხებოდა შესვლა, თუმცა გავუწიეთ შუამდგომლობა ინფრასტრუქტურის სამინისტროს დაქვემდებარებაში მყოფ უწყებასთან, შედეგად ტერიტორია გაიწმინდა და პრობლემა მოგვარდა“, - განმარტავენ მერიის საზოგადოებასთან ურთიერთობის სამსახურში.

წყალმომარაგების კომპანიაში კი ირწმუნებიან, რომ მერიასთან კომუნიკაცია არ ყოფილა: „მესხეთის ქუჩაზე არსებული პრობლემა თქვენგან, «სამხრეთის კარიბჭისგან» გავიგეთ“, - გვითხრა გაერთიანებული წყალმომარაგების კომპანიის სამცხე-ჯავახეთის ფილიალის მენეჯერმა ბესო ფილაურმა.

ახალციხის მერიის საზოგადოებასთან ურთიერთობის სამსახურის განმარტებით, ბაღდასაროვების სახლში საკანალიზაციო სისტემის მოწესრიგება მათ არ ეხებათ: „სახლში ჩვენ ვერ გავუკეთებთ, ხოლო საშენი მასალით რომ დავეხმაროთ, ამისთვის წერილობით უნდა მოგვმართონ და შევისწავლით“.

[ავთო ინასარიძე, ახალციხე]