ქეთევან დედოფლის ქუჩაზე ახალდაგებული ასფალტი აყარეს

ახალციხეში, ქეთევან დედოფლის ქუჩაზე, გზის სამშენებლო სამუშაოები ერთი კვირის წინ დასრულდა, თუმცა დღეს, 4 სექტემბერს დილით გაერთიანებული წყალმომარაგების კომპანიის თანამშრომლებმა გზის ნაწილი ათხარეს. როგორც უწყების თანამშრომლები აცხადებენ, აქ ერთ–ერთი ადგილობრივის საკანალიზაციო სისტემა იყო დაზიანებული, თუმცა მისი შეკეთება ვიდრე ასფალტი არ დაიგო, ვერ მოხერხდა.

„ის ადგილობრივი სახლში არ იყო რომ გზის გაკეთებამდე დაზიანებული კანალიზაციის ქსელის შეკეთება მოგვესწრო. როცა დავუკავშირდით, სახლის მეპატრონეს, ქსელის შეკეთებაც მაშინ მოვახერხეთ“, – ამბობს საქართველოს გაერთიანებული წყალმომარაგების კომპანიის ტექნიკური აქტივობის მართვის დეპარტამენტის უფროსი მიხეილ თათარაძე.

მისივე თქმით, ქეთევან დედოფლის ქუჩაზე აყრილ ასფალტს, ის კომპანია გააკეთებს, რომელმაც გზის სარეაბილიტაციო სამუშაოები განახორციელა: „ეს საკითხი უკვე შეთანხმებული გვაქვს“.

ქეთევან დედოფლის ქუჩაზე გზის სარეაბილიტაციო სამუშაოები ტენდერში გამარჯვებულმა კომპანიამ „საგზაო სამშენებლო სამმართველო N1–მა“ შეასრულა. მან ქეთევან დედოფლისა და ქალაქის კიდევ ცხრა ქუჩა 795 000 ლარის ფარგლებში მოაასფალტა.

მშენებელ კომპანიაში აცხადებენ, რომ აყრილ ასფალტს ისევ თვითონ დააგებენ, თუმცა ამას სამი დღე სჭირდება: „ჯერ მიწა უნდა დაჯდეს და სხვა სამუშაოები მერე განხორციელდება".

[ლუბა გიორგაძე, ახალციხე]