ახალციხის მუნიციპალიტეტის გამგებლის ყოფილი მოადგილე პასუხისგებაში მისცეს

ახალციხის მუნიციპალიტეტის გამგებლის უკვე ყოფილ მოადგილეს კარლენ მანასიანს პროკურატურამ ბრალი 29 აპრილს წაუყენა. მას გამოძიება სისხლის სამართლის კოდექსის 125–ე მუხლით გათვალისწინებული დანაშაულის ჩადენას ედავება, რაც ცემას გულისხმობს.

ბრალდების მხარემ ახალციხის რაიონულ სასამართლოში მანასიანისთვის აღკვეთის ღონისძიებად 1000 ლარის შეფარდება ითხოვა. თუმცა, სასამართლოს გადაწყვეტილებით მანასიანს აღკვეთის ღონისძიებად ქვეყნიდან გაუსვლელობა შეეფარდა.

პროკურატურა აღნიშნულ გადაწყვტილებას ასაჩივრებს.

შეგახსენებთ, რომ კარლენ მანასიანმა პირადი განცხადების საფუძველზე გამგებლის მოადგილის პოზიცია 28 აპრილს დატოვა. იგი აღნიშნულ თანამდებობაზე ერთი წლის წინ დაინიშნა.

მანასიანს ბრალი „კადასტრი რეესტრი პლუსის“ დირექტორის დავით გოგოგლაძეს ცემაში ედება. შემთხვევა 20 აპრილს, სწორედ „კადასტრი რეესტრი პლუსის“ ოფისში მოხდა.

[თამუნა უჩიძე, ახალციხე]