ახალციხის მუნიციპალიტეტის გამგებლის მოადგილეს ცემაში ადანაშაულებენ

შემთხვევა ახალციხეში, თამარაშვილის ქუჩაზე, „კადასტრი რეესტრი პლუსის“ ოფისში, გუშინ, 20 აპრილს, 15:00 საათისთვის მოხდა. კომპანიის დირექტორს დავით გოგოლაძესა და ახალციხის მუნიციპალიტეტის გამგებელის მოდგილეს კარლენ მანასიანს შორის სიტყვიერი შეურაცხყოფა ფიზიკურ დაპირისპირებაში გადაიზარდა.

ვითარების დაძაბვის მიზეზი, ვალეში ერთ–ერთ კორპუსში, ბინისთვის მისამართის მინიჭების საკითხი გახდა.

„ბებო მოვიდა, იუსტიციაში ვიყავი, იქიდან გამგეობაში გამგზავნეს, გამგეობიდან ვალეში, ვერ გავიგე როგორ მოვიქცე და დამეხმარეო. ამონაწერში კორპუსის ნომერი ჰქონდა მითითებული, ბინის კი არა და ამაში სჭირდებოდა დახმარება“, – გვიხსნის გოგოლაძე.

მისი თქმით, ვალეში მცხოვრებს გამგეობაში ბინის ნახაზი მოსთხოვეს და იმისთვის, რომ უკეთ გარკვეულიყო როგორი ნახაზი სჭირდებოდა, ეს ქალი ისევ გამგეობაში გადაამისამართა: „ფურცელზე დავუწერე, მისამართების მინიჭების კომისიის თავმჯდომარე, ან კომპეტენტური პირი ვინც არის, შეახვედრეთ თუ შეიძლება–მეთქი. ბოლოში ჩემი ნომერი მივაწერე, რომ დამკავშირებოდნენ და აეხსნათ რა ნახაზზე იყო საუბარი“.

ამის შემდეგ, გოგოლაძეს ტელეფონით კარლენ მანასიანი დაუკავშირდა. აუხსნა, რომ დამისამართების კომისიის ხელმძღვანელი იყო და დარეკვიდან რამდენიმე წუთში მასთან ოფისშიც მივიდა.

„ასეთი „რესკი“ რატომ ხარო. აგრესიულად იყო განწყობილი. როგორ შენ ჭკვიანი ხარ და ჩვენ დებილებიო?! მივხვდი რომ გაუგებრობაში იყო. მეუბნებოდა, ეს რა დაწერე, ვინ არის არაკომპეტენტურიო. ფურცელი სახესთან მომიტანა“, – ამბობს გოგოლაძე.

მისი თქმით, იგი ეცადა მანასიანისთვის აეხსნა, რომ რაღაც არასწორად ესმოდა: „სახე სახესთან მომიტანა, დახედე აქ რა წერიაო. რომ დავაპირე ხელით გამეწია, სახეში დამარტყა. სანამ წამოვდექი კიდევ დამარტყა. წამოვდექი და მაგიდას რომ გავცდი, კიდევ შემომიტია. ეს ყველაფერი წამებში ხდებოდა, ვერ მოვასწარი გააზრება. კარებში გავეკიდე, მოდი აქ– თქო, კიბეზე შემობრუნდა და კიდევ დამარტყა“.

გოგოლაძე ამბობს, რომ თავადაც სცადა მანასიანისთვის დაერტყა: „მგონია, რომ მივწვდი და დავარტყი. სახეზე აქვს ნაკაწრიო“.

მანასიანს აქვს თუ არა დაზიანება სხეულზე, უცნობია. „სამხრეთის კარიბჭე“ მას ვერ შეხვდა. გოგოლაძეს კი ტუჩზე, ყურსა და ყელის არეში დაზიანებები ეტყობა.

ახალციხის მუნიციპალიტეტის გამგეობაში აცხადებენ, რომ მანასიანი გუშინ, 20 აპრილს, შვებულებაში გავიდა. შეკითხვაზე, მაშინ რატომ ასრულებდა გუშინ 15:00 საათისთვის სამსახურეობრივ მოვალეობას გვიპასუხეს: „გუშინ იმუშავა, დღეიდან სამსახურში აღარაა“.

მომხდარის შესახებ არაფერი იცის ახალციხის მუნიციპალიტეტის გამებელმა ზაზა მელიქიძემ: „შვებულებაზე რომ განცხადება შემოვიდა, ხელი მოვუწერე, პირადად არ მინახავს. არც ვიცოდი ამის შესახებ. ცუდია თუ ასე მოხდა“.

შვებულებაში გასულ მოადგილესთან „სამხრეთის კარიბჭემ“ დაკავშირება ტელეფონით სცადა, თუმცა მისი მობილური გამორთულია. მანასიანი არც სახლში დაგვხვდა.

„სამხრეთის კარიბჭე“ მის მამას, აშოტ მანასიანს ესაუბრა. მან დეტალებზე საუბრისგან თავი შეიკავა, თუმცა ის, რომ შვებულებაში მომხდარის გამო გავიდა, პირად საუბარში დაგვიდასტურა.

მანასიანი 28 აპრილის ჩათვლით შვებულებაშია. მანამდე, შესაძლოა ექსპერტიზის პასუხების შედეგები ცნობილი გახდეს. სამცხე–ჯავახეთის პროკურატურაში აცხადებენ, რომ ექსპერტიზა დანიშნული ორივე მხარეზეა.

შინაგან საქმეთა სამინისტროში კი ამბობენ, რომ ძიება სისხლის სამართლის კოდექსის 125–ე მუხლით დაიწყო, რაც ცემას გულისხმობს.

მომხდარის შესახებ გოგოლაძემ ახალციხის რაიონულ სამმართველოს პირადად შეატყობინა. მან განცხადება პოლიციაში დაწერა.

[თამუნა უჩიძე, ახალციხე]