ვინ არის ახალციხის მუნიციპალიტეტის გამგებლის ახალი მოადგილე

კარლენ მანასიანი ახალციხის მუნიციპალიტეტის გამგებლის მოადგილედ გუშინ, 23 მარტს დაინიშნა, მუშაობას ოფიციალურად დღეს, 24 მარტს შეუდგა.

„უკვე გავეცანი სამუშაოს და იმედი მაქვს, რომ ჩემზე დაკისრებულ მოვალეობას კარგად შევასრულებ. მოსახლეობას იმედს არ გავუცრუებ“, – ამბობს კარლენ მანასიანი.

ახალციხის მუნიციპალიტეტის გამგებლის პირველი მოადგილე გურამ მელიქიძე ამბობს, რომ მანასიანი განათლებული და კომუნიკაბელური ახალგაზრდაა.

„გამგებლის ახალი მოადგილე კომუნიკაბელური, განათლებული და ნიჭიერი ახალგაზრდაა. იმედი გვაქვს, რომ მისი მუშაობა მუნიციპალიტეტს უფრო მეტ სიკეთეს მოუტანს. მანასიანი არის სომეხი ეროვნების, სახელმწიფო ენაც კარგად იცის, ამიტომ ის დაგვეხმარება ეთნიკურად სომეხ მოსახლოებასთან ურთიერთობაში“, – ამბობს გურამ მელიქიძე.

კარლენ მანასიანი 1990 წლის 9 აპრილს ქალაქ ახალციხეში დაიბადა. დაამთავრა ახალციხის მესამე საჯარო სკოლა.
2011 წელს დაამთავრა სამცხე – ჯავახეთის სახელმწიფო უნივერსიტეტი, ზუსტი და საბუნებისმეტყველო მეცნიერებათა ფაკულტეტი, კერძოდ ეკოლოგია. სამუშაო გამოცდილება არ აქვს.

ჰყავს მეუღლე და ერთი შვილი.

კარლენ მანასიანი ახალციხის მუნიციპალიტეტის გამგებლის ყოფილი მოადგილის აშოტ მანასიანის უფროსი ვაჟია.

შეგახსენებთ, რომ ახალციხის მუნიციპალიტეტის გამგებლის ახალი მოადგილე გურამ მელიქიძემ დღეს, 24 მარტს გამგეობის ტრადიციულ თათბირზე წარადგინა.

[მანანა სარაშვილი, ახალციხე]