ახალციხის გამგებლის ყოფილ მოადგილესთან განრიდება გაფორმდა

დღეს, 14 ივნისს ახალციხის რაიონულ სასამართლოში ახალციხის მუნიციპალიტეტის გამგებლის ყოფილი მოადგილის კარლენ მანასიანის საქმის განხილვა უნდა დაწყებულიყო, თუმცა, სასამართლოში საქმე არ შესულა.

პროკურატურამ მანასიანთან განრიდება გააფორმა და 2 000 ლარით დააჯარიმა. განრიდების შესახებ დოკუმენტი 6 ივნისს გაფორმდა.

შეგახსენეთ, კარლენ მანასიანს ბრალი სსკ–ის 125–ე მუხლით ედებოდა, რაც ცემას გულისხმობს. მას პროკურატურა „კადასტრი რეესტრი პლუსის“ დირექტორის დავით გოგოგლაძის ცემის გამო ედავებოდა. შემთხვევა 20 აპრილს, სწორედ „კადასტრი რეესტრი პლუსის“ ოფისში მოხდა.

ამის შემდეგ, 28 აპრილს, მანასიანმა პირადი განცხადების საფუძველზე გამგებლის მოადგილის პოზიცია 28 აპრილს დატოვა. იგი აღნიშნულ თანამდებობაზე ერთი წლის წინ დაინიშნა.

[თამუნა უჩიძე, ახალციხე]