დასახლებაში, სადაც საკანალიზაციო ქსელი არ არის, არჩევნების ბოიკოტირებით იმუქრებიან

საბარგო სადგურის დასახლებაში ფეკალიების სუნი მიახლოებისთანავე იგრძნობა. აქ ყველა ქუჩას ღია საკანალიზაციო არხი მიუყვება.

„ფანჯრებიდან ფეკალური მასის სუნი შემოდის. ბაშვებს ღია კანალიზაციაში ბურთი უვარდებთ, იღებენ და თამაშს აგრძელებენ. ასე შეიძლება?! ამიტომ ხვდებათ ათასი დაავადება“, – ამბობენ საბარგო სადგურის მცხოვრებლები.

მათივე თქმით, პრობლემა განსაკუთრებით ზაფხულში მწვავდება. ღია არხებთან უამრავი მწერი ჩნდება და ინფექციური დაავადებების საფრთხე მატულობს. თუმცა, პრობლემა მხოლოდ ეს არ არის. ღია არხები ადგილობრივების ბოსტნებს მიუყვება, აქ მოყვანილ პროდუქტს კი ადგილობრვები თავადაც ჭამენ და ბაზარშიც ყიდიან.

„რამდენჯერ დაგვპირდნენ დახმარებას, რამდენჯერ! საშინელი სიბინძურეა. მერიაში ცხრაჯერ ვიყავი, თუმცა უშედეგოდ. წინასაარჩევნოდ კოპაძემ [ქალაქის მერი, მაშინ მერობის კანდიდატი] გვითხრა, მე თუ საკანალიზაციო სისტემის პრობლემას არ მოგიგვარებთ, მაგიდა გადამიტრიალეთო“, – იხსენებს ნინო სამყურაშვილი.

ახლა საბარგო სადგურზე გარე განათება მონტაჟდება. ადგილობრივებს ქუჩის განათების პერსპექტივა მოსწონთ, თუმცა, ამბობენ, რომ განათებულ ანტისანიტარიას ბნელი სისუფთავე ერჩივნათ.

„ახლა კანალიზაციის პრობლემის მოგვარება უფრო მნიშვნელოვანი არ იყო?“ – უკვირს მედიკო ხოლოხჩიანს.

ახალციხის მერიაში ამბობენ, რომ საბარგო სადგურის პრობლემების შესახებ იციან. მერის მოადგილე ზაზა გელაძე ირწმუნება, რომ ქალაქის მერის გიორგი კოპაძისა და სამცხე–ჯავახეთის გუბერნატორის აკაკი მაჭუტაძის დამსახურებით, საკანალიზაციო სისტემის პროექტი მზადაა და დაფინანსებას ელოდება.

„თანხა როდის გამოიყოფა, არ ვიცი. რასაც გიორგი წვალობს ამ თემაზე, რომ მოგვარდეს ეს პრობლემა, ვერ აგიხსნი. კვირაში სამჯერ შეიძლება მაგის გულისთვის წავიდეს თბილისში. ველოდებით როდის მოგვივა დადებითი პასუხი „წყალკანალისგან“, – აცხადებს ქალაქის მერის მოადგილე ზაზა გელაძე.

დაფინანსებას ელოდებიან საქართველოს გაერთიანებული წყალმომარაგების კომპანიაშიც (რომელსაც მერის მოადგილე ‘წყალკანალს’ უწოდებს). კომპანიის საზოგადოებასთან ურთიერთობის სამსახურის წარმომადგენელის, ნინო რამიშვილის განმარტებით, საბარგო
სადგურის საკანალიზაციო სისტემის რეაბილიტაციის პროექტი კომპანიას მზად აქვს და ელოდება დაფინანსებას ცენტრალური ბიუჯეტიდან.

როდის გამოიყოფა დაფინანსება, ჯერ არც გაერთიანებული წყალმომარაგების კომპანიაში იციან და არც ახალციხის მერიაში. მათგან განსხვავებით, საბარგო სადგურის დასახლების 1500–მდე მცხოვრებმა ზუსტად იცის, რომ მომავალ არჩევნებამდე საკანალიზაციო ქსელს თუ არ გაუკეთებენ, არჩევნებს ბოიკოტს გამოუცხადებენ.

„მოდის არჩევნები და ჩვენც გავითვალისწინებთ. თუ პრობლემა არ მოგვარდა, არჩევნებზე არ წავალთ. ფეხებს მოვამტვრევთ იმას, ვინც საარჩევნო უბანზე მივა“, – აცხადებენ საბარგო სადგურზე.









[ვარლამ წიკლაური, ახალციხე]