'ეს ბატონი ბიძინას დამსახურებაა' – მეუფე თეოდორემ ივანიშვილის დაფინანსებულ პროექტებზე ისაუბრა [ვიდეო]

ფოტო: ქართული ოცნების ფეისბუქის გვერდიდან

„რესტავრაცია მიმდინარეობს და თითქმის უკვე აწყურის ტაძარი სახურავამდე ავიდა, ძალიან მალე დამთავრდება და ვიზეიმებთ მის გახსნას. ეს ბატონი ბიძინას დამსახურებაა და მისი პირადი შეწევნა, რომ აწყურის ტაძარი შენდება. ბატონი ბიძინას დახმარებით კეთდება ბიეთის სამონასტრო კომპლექსი, აგარები, თისელი, ძალიან ბევრი რამ კეთდება მარტო ჩვენს ეპარქიაში სხვას აღარ ჩამოვთვლი“,– ამ სიტყვებით მიმართა მეუფე თეოდორემ წირვის დასრულების შემდეგ მრევლს.

დღეს, ცხრა აგვისტოს დიდმოწამე პანტელეიმონის ხდენების დღეა და წირვა აბასთუმანში მისივე სახელობის ტაძარში აღევლინა, რომელსაც „ქართული ოცნების“ თავმჯდომარე ბიძინა ივანიშვილი ოჯახთან ერთად ესწრებოდა.

ქადაგების დასრულების შემდეგ, ახალციხისა და ტაო–კლარჯეთის მიტროპოლიტმა ამბიონზე ასვლა ბიძინა ივანიშვილსაც სთხოვა, რომელმაც მრევლს მიმართა.

ივანიშვილმა, მრევლთან აბასთუმნის აღმშენებლობასა და მის მნიშვნელობაზე ესაუბრა:„აბასთუმანი უნდა გახდეს, ერთ–ერთი საუკეთესო ცენტრი მსოფლიოში, ჩვენ თითოეულმა უნდა მოვახერხოთ, მუხლჩაუხრელი შრომით, საქართველო გავხადოთ ერთ–ერთი საუკეთესო მსოფლიოში და დავიწყოთ აბასთუმნით“.

ბიძინა ივანიშვილი ოჯახთან ერთად აბასთუმანში ისვენებს.


ვიდეო: ქართული ოცნების ფეისბუქის გვერდიდან

[ლუბა გიორგაძე, ადიგენი]