რას კითხულობენ ახალგაზრდები

აბიტურიენტი თამუნა ნებაძე ჯონ კრაკაუერის ნაწარმოებს "ველურ გარემოში“ კითხულობს. ამბობს, რომ ცოტახ ნის წინ ჟოზე სარამაგუს „სიბრმავე“ დაამთავრა. ეროვნული გამოცდებისთვის მზადების პროცესში მხატვრული ლიტერატურის საკითხავად ცოტა დრო რჩება, თუმცა ის, რისი წაკითხვაც ძალიან აინტერესებს მაინც ასწრებს.

„მხატვრული ლიტერატურის ყველა ჟანრი მიყვარს, სახლში ბევრი წიგნი მაქვს და ამიტომ ბიბლიოთეკაში იშვიათად დავდივარ“, – ამბობს ნებაძე.

წიგნების კითხვა უყვარს ნიკა გიქოშვილსაც. ის უპირატესობას სათავგადასავლო ჟანრს ანიჭებს. როგორც თავად ამბობს, ბოლოს ნოდარ დუმბაძის „ნუ გეშინია დედა“ წაიკითხა. მასაც, ისევე როგორც თამუნას სახლში ბევრი წიგნი აქვს: „ბიბლიოთეკას მხოლოდ იმ შმეთხვევაში ვაკითხავ თუ რაიმე წიგნი დამაინტერესდა და სახლში ვერ აღმოვაჩინე“.

ახალციხის ცენტრალურ ბიბლიოთეკას, რომლის ბალანსზეც 47 000 წიგნი ირიცხება, ძირითადად ახალგაზრდები აკითხავენ. როგორც ბიბლიოთეკაში გვიხსნიან, მათი უმეტესობა მხატვრული ლიტერატურით ინტერესდება.

„ჩვენი ყველაზე ხშირი მკითხველები მოსწავლეები და სტუდენტები არიან“, – ამბობს ახალციხის ცენტრალური ბიბლიოთეკის მთავარი სპეციალისტი ლილი აჩელაშვილი.

მხატვრული ლიტერატურის მოყვარული ახალგაზრდებისთვის ბიბლიოთეკაში 16 ათასი წიგნი ინახება.

მეგი ფეიქრიშვილი ბიბლიოთეკის ხშირი სტუმარია. ამბობს, რომ აქ მხატვრული ლიტერატურის ფართო არჩევანია: „რომანების კითხვა მიყვარს. ახლა ვკითხულობ პაოლო კოელიოს „გამარჯვებული მარტოა“.

ბიბლიოთეკაში ამბობენ, რომ ახალგაზრდების დიდ ნაწილს თანამედროვე ქართველ მწერლებთან შედარებით, უცხოური ლიტერატურა უფრო აინტერესებთ: „მაგალითად, იშვიათად კითხულობენ თანამედროვე ქართულ დეტექტივებს. მაგრამ თუ რომელიმე ახალშემოტანილ წიგნს გაიტანს ახალგაზრდა, მერე ის ყველაზე მოთხოვნადი ხდება“.

ლილი აჩელაშვილის თქმით, ახლა დიდი პოპულარობით ერიხ მარია რემარკის „ნასესხები სიცოცხლე“, „სამი მეგობარი“ და „ტრიუმფალური თაღი“ სარგებლობს.

„იშვიათად გააქვთ სამეცნიერო ლიტერატურა, ეს მხოლოდ იმ შემთხვევაში თუ სასწავლო პროგრამით რაიმეს მომზადება ევალებათ“. – ამბობს იგი.

ახალციხის ბიბლიოთეკაში დღის განმავლობაში, დაახლოებით, 40–60 მკითხველი შედის. აქ ორი კვირის წინ, უცხოელი და ქართველი მწერლების, 33 ახალი წიგნი შეიტანეს. ბიბლიოთეკას დაემატა ზუზაკის "წიგნის ქურდი“, ბურჭულაძის "მკაცრი რეჟიმი“, ბუხრაშვილის "მყუდრო აგარაკი“, ასევე ბუხრაშვილის "სამხილი“ და ა. შ.



[მარიამ ბარძიმაძე – ახალციხე]