მკითხველის არჩევანი - რას კითხულობენ ახალციხეში

„ყველაზე დიდი მოთხოვნა საბავშვო წიგნებზეა. სერია Liberteens–ზე და 50 წიგნზე. ძირითადად ახალგაზრდები მოდიან. უფროსი თაობის ადამიანებზე რა გითხრათ, თანამედროვე ლიტერატურა არ აინტერესებთ, თუმცა მოდიან ხოლმე“, - “ბიბლუსის” კონსულტანტი ქეთი გვიყვება, თუ რომელ წიგნებს ყიდულობენ ყველაზე ხშირად და რა ასაკის მკითხველი სტუმრობს მაღაზიას.



კოტე და გურამი, 10 წლისანი არიან – „ახლა ვკითხულობ ართურ კონან დოილის ბასკერვილების ძაღლს. გაკვეთილების მერე როცა დრო მრჩება ვცდილობ რომ ვიკითხო, კვირაში სამჯერ მაინც.

„მე ნოდარ დუმბაძის მოთხრობებს ვკითხულობ ხოლმე,“– გვითხრა გურამმა.

„ახლა არაფერს, თუმცა ბოლო დროს უფრო თანამედროვე ქართულ ლიტერატურას ვკითხულობ. ნაირა გელაშვილის რომანი მირჩია მეგობარმა და ვაპირებ დაწყებას. ზოგადად ამ მწერლის რამდენიმე წიგნი მაქვს წაკითხული და ძალიან მომწონს მისი სტილი.“ – გვეუბნება 34 წლის ქეთი.

„კონსტანტინე გამსახურდია ჩემი საყვარელი მწერალია. თანამედროვე ლიტერატურა დიდად არც მესმის და არც მაინტერესებს. მირჩევნია იმ წიგნების კითხვა, რომლებიც ომებს და მნიშვნელოვან ისტორიულ მოვლენებს ეხება.“ – ამბობს 71 წლის პენსიონერი, გიორგი, რომელსაც ასევე წიგნის მაღაზიაში შევხდით.

კიდევ ერთი ადგილი ახალციხეში, სადაც მკითხველის ინტერესების შესახებ შეიძლება შევიტყოთ, უნივერსიტეტის ბიბლიოთეკაა.



ბიბლიოთეკის ტექნიკური ხელმძღვანელი, ხათუნა კვინცხაძე გვიხსნის, რომ ბიბლიოთეკის ხშირ სტუმრებს, სამეცნიერო და სილაბუსით გათვალისწინებული საკითხავის გარდა, თანამედროვე უცხოენოევანი ლიტერატურა აინტერესებთ, - “ ბოლო პერიოდში, გაიზარდა მოთხოვნა ფსიქოლოგიაზეც, დაინტერესდნენ უზნაძით, ფროიდით. კითხულობენ ქართველ ავტორებსაც”.



„ჰელოუ კიტი“ და „სახალისო გეომეტრია“ – სკოლის მოსწავლეები ქეთი და გაგა.
უნივერსიტეტის ბიბლიოთეკის გარდა, ქალაქში ცენტრალურ ბიბლიოთეკაცაა, სადაც გვეუბნებიან, რომ მათთან ყველა ჟანრს ჰყავს თავის მკითხველი.



„ახალგაზრდები ყველაზე ხშირად მოდიან, ძირითადად ისტორიულ წიგნებზეა მოთხოვნა. სხვათაშორის სტალინი აინტერესებთ, ჰიტლერიც. როგორც თვითონ ამბობენ უნდათ, რომ წაიკითხონ და თვითონ გამოიტანონ დასკვნა, თუ ვინ იყვნენ ეს ადამიანები. ბიბლიოთეკაში 12–დან 4 საათამდე მკითხველების ბუმია. სულ 50 ადგილი გვაქვს და გადავსებულია ხოლმე. – გევუბნება ბიბლიოთეკის მთავარი სპეციალისტი, მარინე ბერიძე და დასძენს, რომ ფსიქოლოგიური და ფილოსოფიური ლიტერატურის სიმწირეს უჩივიან.

23 აპრილი იუნესკომ წიგნისა და საავტორო უფლებების საერთაშორისო დღედ გამოაცხადა - 1616 წელს, ამ დღეს, მსოფლიოს ორი უდიდესი ავტორი გარდაიცვალა - უილიამ შექსპირი და მიგელ დე სერვანტესი.

[ავთო ინასარიძე, ახალციხე]