დატოვებს თუ არა 'ქართული ოცნების' დეპუტატის მანდატს კახა ბერიძე

პარტია „ქართული ოცნების“ დეპუტატი კახა ბერიძე აცხადებს, რომ ფრაქცია „ქართული ოცნების“ დატოვებას დიდი ხნის წინ აპირებდა: „უბრალოდ, ამ დრომდე ამისთვის ვერ მოვიცალე“.

შეკითხვაზე, ახალციხის საკრებულოს თავმჯდომარეობის, კომისიისა და ფრაქციის დატოვების შემდეგ, ხომ არ აპირებს მანდატზეც უარი თქვას, გვპასუხობს: „ჯერ მანდატის დატოვებას არ ვაპირებ, თუ რაიმეში არ შემიშალა ხელი. მოკლედ არ ვაპირებ“.

ასევე შეკითხვაზე, რატომ გადაწყვიტა ფრაქცია დაეტოვებინა, ამბობს: „საკრებულოს თავმჯდომარედ რომ დავინიშნე, იმდენ ადამიანს არ მოულოცია, რამდენმაც გადადგომა მომილოცა. თავმჯდომარეობიდან რომ წამოვედი, ალბათ უკვე ჩანდა, რომ ასეც მოხდებოდა და ფრაქციასაც დავტოვებდი“.

შეგახსენებთ, კახა ბერიძემ ფრაქცია ‘ქართული ოცნება’ გუშინ, 4 აპრილს დატოვა. გასული წლის 7 სექტემბერს მან საფინანსო საბიუჯეტო კომისია, 7 აგვისტოს კი ახალციხის საკრებულოს თავმჯდომარეობა დატოვა.

[თამუნა უჩიძე, ახალციხე]