ახალციხის საკრებულოს თავმჯდომარე თანამდებობის დატოვებას აპირებდა [Video]

ამის შესახებ ბერიძემ დღეს, 28 აპრილს, ახალციხის მუნიციპალიტეტის საკრებულოს რიგით მეექვსე საკრებულოს სხდომაზე განაცხადა.

„მართლაც ვფიქრობდი გადადგომას, თბილისის ერთ–ერთი კლინიკის მენეჯერად გადასვლას მთავაზობდნენ. მაგრამ ახლა იმ საქმის მიტოვება, რასაც ვაკეთებ, ვფიქრობ, რომ ღალატის ტოლფასი იქნება. ასე რომ, ვფანტავ გავრცელებულ ჭორებს და ვამბობ, არ მივდივარ“, – განაცხადა კახა ბერიძემ საკრებულოს სხდომაზე.



ბერიძის თანამდებობაზე დარჩენას უმცირესობაც მიესალმება და უმრავლესობაც.

„ჯერ ახლა მივიღეთ დებულებები, ეგრე სადაა, შენ წახვიდე და პასუხისმგებლობა ჩვენ აგვკიდო“, – უთხრა ბერიძეს „ნაციონალური მოძრაობის წარმომადგენელმა“ საკრებულოში მალხაზ გიქოშვილმა.

საკრებულოს თავმჯდომარეს შეთავაზება თბილისში, ერთ–ერთი ონკოლოგიური კლინიკიდან ჰქონდა.

„ცდუნება დიდი იყო, ერთი თვე მოვანდომე ამაზე ფიქრს. ერთი თვე შვებულებაში ყოფნისას კლინიკაში ჩემ მეგობრებს მოვეხმარე პირველი ნაბიჯების გადადგმაში და აქედან გაჟონა ინფორმაციამ, რომ კახა მიდის“, – აცხადებს ბერიძე.

[თამუნა უჩიძე, ოთარ აწყურელი, ახალციხე]