ახალციხის ბაღებში დეზინფექცია ტარდება

ქალაქ ახალციხის სკოლამდელი აღზრდის დაწესებულებათა გაერთიანებაში განმარტავენ, რომ ქვეყანაში ჰაერწვეთოვანი გზით გადამდები ინფექციური დაავადებების შემთხვევების მომატებასთან დაკავშირებით, პრევენციის მიზნით, ბაგა–ბაღებში სადეზინფექციო ხსნარით ყველა ოთახს ამუშავებენ.

„ექთანი დღეში რამდენჯერმე ამოწმებს ჯგუფებს. თუ ვინმეს აქვს გამონადენი ცხვირიდან , ან სიცხე, მაშინვე ვუკავშირდებით მშობელს და სახლში მიჰყავს“, – ამბობს ქალაქ ახალციხის სკოლამდელი აღზრდის დაწესებულებათა გაერთიანების ხელმძღანელი ნანა ბერიძე.

მისი თქმით, ბაგა–ბაღებში ბავშვების დასწრებამ იკლო, თუმცა მიზეზი გრიპის ვირუსი არ არის: „გადავამოწმეთ მშობლებთან და ამბობენ, რომ ეშინიათ და ბავშვები ბაღში იმიტომ არ მოჰყავთ. ამ ეტაპზე ავადმყოფობის გამო სკოლამდელი აღზრდის დაწესებულებებში, დაახლოებით 30 ბავშვი არ დადის“.

სპეციალური ხსნარით მუშავდება ოთახები და ინვენტარი ახალციხის თემის ბაგა–ბაღებშიც.

„20 იანვარს უნდა დაგვეწყო სასწავლო პროცესი, თუმცა ამის გამო შევაჩერეთ ორშაბათამდე, რომ გენერალურად დაგვექლორა ყველაფერი. სათამაშოები, სამზარეულოს ჭურჭელი, თითქმის ყველაფერი სპეციალური ხსნარით დავამუშავეთ, რასაც ბავშვი ეხება“, – აბობს ახალციხის თემის სკოლამდელი აღზრდის დაწესებულებათა გაერთიანების ხელმძღვანელი ლელა ზაზაძე.

[თინათინ ზაზაძე, ახალციხე]