საქართველოს პარლამენტის თავმჯდომარე დავით უსუფაშვილი ამბობს, რომ რესპუბლიკური პარტია და პარტია „ქართული ოცნება“ დღემდე პარტნიორობის რეჟიმში იყვნენ, დღეიდან პარტნიორობა-კონკურენციის რეჟიმში გადადიან.
დავით უსუფაშვილის განცხადებით, პარტიისთვის ნათელი იყო, რომ "ქართული ოცნების" პრიორიტეტი იყო უახლოეს არჩევნებზე დამოუკიდებლად გასვლა.
„ჩვენ გვქონდა ძალიან მჭიდრო კონსულტაციები ბატონ გიორგი კვირიკაშვილთან, სხვა პირებთან, კოალიციის ლიდერებთან. ჩვენი გადაწყვეტილების მიღებამდე ჩვენთვის ნათელი იყო, რომ პარტია "ქართული ოცნების" პრიორიტეტია უახლოეს არჩევნებზე დამოუკიდებლად გასვლა, როგორც პარტიის და ამ რეალობაში ჩვენ, რა თქმა უნდა, ვიღებთ ამ გამოწვევას, ამ რეალობას, რომელიც მრავალპარტიული ცხოვრებისთვის ნორმალური მოვლენაა“.
მისივე თქმით, კოალიციები იქმნება არჩევნებიდან არჩევნებამდე ქვეყნის სამართავად, ხოლო რაც შეეხება არჩევნებს, მასზე პარტიები გადიან ან ცალ-ცალკე, ან საარჩევნო ბლოკებად: „ამიტომ ჩვენი მიღებული გადაწყვეტილება არის გარკვეულწილად ახალი სიტყვა ქართული პოლიტიკური დემოკრატიული სისტემის განვითარებასა და წინსვლაში".
შეგახსენებთ, რომ დღეს "რესპუბლიკელებმა" განაცხადეს, რომ კოალიციიდან გადიან და 2016 წლის არჩევნებში
დამოუკიდებლად მიიღებენ მონაწილეობას. აქვე, მათ განმარტეს, რომ მათი ეს გადაწყვეტილება არ ნიშნავს სამთავრობო თანამდებობების
ავტომატურ რეჟიმში დატოვებას.
„სამთავრობო თანამდებობებს დავტოვებთ მხოლოდ საკუთარი პოლიტიკური დღის წესრიგის ან პრემიერ-მინისტრის გადაწყვეტილების გამო და არავითარ შემთხვევაში - ოკუპანტი ქვეყნის, ადგილობრივი სტალინელების, ანტი-ნატოელებისა და ვიდეო-შანტაჟისტების კოორდინირებული თუ დამთხვეული ულტიმატუმების ფონზე“, – ნათქვამია პარტიის განცხადებაში.
პრემიერმინისტრის გიორგი კვირიკაშვილის განცხადებით, რესპუბლიკელი მინისტრები ჩვეულებრივად აგრძელებენ მთავრობის შემადგენლობაში ფუნქციონირებას: „ამ კუთხით დღესდღეობთ, ყოველ შემთხვევაში და არჩევნებამდე ჩემი გადაწყვეტილებაა, რომ არ უნდა ველოდოთ ცვლილებებს. თუმცა, კიდევ ერთხელ ვამბობ, ეს დიდწილად დამოკიდებული იქნება იმ მცდელობის წარმატებაზე, რომ ჩვენ ნორმალურ რეჟიმში გავაგრძელოთ ურთიერთობა, პარტიათა შორის ურთიერთობას ვგულისხმობ, რა თქმა უნდა. კიდევ ერთხელ ვამბობს, პოლიტიკური დღის წესრიგი, დღესდღეობით ყოველ შემთხვევაში, არ გვკარნახობს არანაირიად, რომ რაიმე ცვლილებები მოვახდინოთ მთავრობის შემადგენლობაში”.
დავით უსუფაშვილმა დღესვე განაცხადა, რომ პარტია არ გააჩენს არანაირ კითხვას ქვეყნის განვითარების ვექტორებთან დაკავშირებით.
"არ შევუშლით ხელს ქვეყნის ეკონომიკურ წარმატებას, რომ არც ერთი კითხვა არ უნდა გაჩნდეს იმასთან დაკავშირებით, ქვეყანაში რაიმე დესტაბილიზაციის საფრთხე ხომ არ არის. ეს არის ჩემი პასუხი იმ კრიტიკოსებთანაც, რომლებიც ბრძანებენ, რომ რატომ დაუყოვნებლივ არ მიდიხართ ოპოზიციაში. არ მივდივართ, რადგან ერთად ავიღეთ პასუხისმგებლობა, ერთად ვმართავთ ქვეყნას და კარგად გვესმის ის, რომ ჩვენი ახლა პოსტებიდან წასვლა, პარლამენტში უმრავლესობის დაშლა რა სირთულეებს შექმნის", – განაცხადა უსუფაშვილმა.
[ნინო ნარიმანიშვილი, ახალციხე]