‘რესპუბლიკელები’: თანამდებობს დავტოვებთ მხოლოდ საკუთარი პოლიტიკური დღის წესრიგის ან პრემიერ-მინისტრის გადაწყვეტილების გამო

„რესპუბლიკური პარტიის“ განცხადებით, 2016 წლის არჩევნებში ინდივიდუალური მონაწილეობა არ ნიშნავს კოალიციიდან, საპარლამენტო უმრავლესობიდან, მთავრობიდან და საკრებულოებში უმრავლესობებიდან რესპუბლიკელების ავტომატურ და დაუყოვნებლივ გასვლას.

„სამთავრობო თანამდებობებს დავტოვებთ მხოლოდ საკუთარი პოლიტიკური დღის წესრიგის ან პრემიერ-მინისტრის გადაწყვეტილების გამო და არავითარ შემთხვევაში - ოკუპანტი ქვეყნის, ადგილობრივი სტალინელების, ანტი-ნატოელებისა და ვიდეო-შანტაჟისტების კოორდინირებული თუ დამთხვეული ულტიმატუმების ფონზე“, – ნათქვამია პარტიის განცხადებაში.

გარდა ამისა, „რესპუბლიკელები“ აცხადებენ, რომ მათი შემდგომი მოქმედებები დამოკიდებული იქნება პარტია „ქართული ოცნების“ დაანონსებულ განახლებაზეც: „ ჩვენ შეიძლება მოვახერხოთ კოალიციური სახელისუფლებო პასუხისმგებლობის კიდევ გარკვეული ვადით ზიდვა პრემიერ-მინისტრ კვირიკაშვილთან და მისი ხედვების შესაბამისად მოქმედ გუნდთან ერთად, მაგრამ ამას ნამდვილად ვერ შევძლებთ თუ პოლიტიკური დღის წესრიგის განსაზღვრა თავისუფალ რეჟიმში მოქმედი ინდივიდების საჯარო განცხადებებით გაგრძელდება“.

მათივე განცხადებით , რესპუბლიკელი მინისტრები მთავრობაში ყოფნის პერიოდში პრემიერ-მინისტრის ხელმძღვანელობით გააგრძელებენ პარლამენტის მიერ დამტკიცებული სამთავრობო პროგრამის შესრულებას: „ამავე პერიოდში პარლამენტში ვითარება პირიქით იქნება - ფრაქცია „რესპუბლიკელები“ იხელმძღვანელებს პარტიული პოლიტიკური პრიორიტეტებით, გარდა უმრავლესობის ფორმატში წინასწარ შეთანხმებული საკითხებისა“.

შეგახსენებთ, ამ ეტაპზე მთავრობაში სამი „რესპუბლიკელი“ მინისტრია.

აქვე შეგახსენებთ, რომ დღეს, 31 მარტს, 12:00 საათზე საქართველოს რესპუბლიკური პარტიის თავმჯდომარე, ხათუნა სამნიძემ ბრიფინგი გამართა და გაასაჯაროვა პარტიის ეროვნული კომიტეტის გადაწყვეტილება 2016 წლის საპარლამენტო არჩევნებში რესპუბლიკური პარტიის მონაწილეობის ფორმასთან დაკავშირებით. პარტიამ გადაწყვიტა, რომ არჩევნებში დამოუკიდებლად მიიღებს მონაწილეობას.

[ნინო ნარიმანიშვილი, ახალციხე]