პრემიერი: 'რესპუბლიკელი' მინისტრები თანამდებობებს შეინარჩუნებენ

მთავარი → პოლიტიკა 31.03.2016

საქართველოს პრემიერ – მინისტრის გიორგი კვირიკაშვილის განცხადებით, "რესპუბლიკელი" მინისტრები თანამდებობებს არ დატოვებენ.

პრემიერი: 'რესპუბლიკელი' მინისტრები თანამდებობებს შეინარჩუნებენ

ამის შესახებ პრემიერმა ჟურნალისტებთან საუბრისას განაცხადა.

"ვთვლით, რომ ნორმალური და მისაღებია, როდესაც "ქართული ოცნება" დამოუკიდებლად გავა არჩევნებში. "რესპუბლიკელების" მინისტრები ჩვეულებრივად გააგრძელებენ მთავრობაში მუშაობას. მიუხედავად "რესპუბლიკური პარტიის" განცხადებისა, მიგვაჩნია, რომ ამ ეტაპზე საჭიროა გავაგრძელოთ მუშაობა ჩვეულებრივად", - განაცხადა კვირიკაშვილმა.

შეგახსენებთ, რომ დღეს "რესპუბლიკელებმა" განაცხადეს, რომ კოალიციიდან გადიან და 2016 წლის არჩევნებში დამოუკიდებლად მიიღებენ მონაწილეობას. აქვე, მათ განმარტეს, რომ მათი ეს გადაწყვეტილება არ ნიშნავს სამთავრობო თანამდებობების ავტომატურ რეჟიმში დატოვებას.

„სამთავრობო თანამდებობებს დავტოვებთ მხოლოდ საკუთარი პოლიტიკური დღის წესრიგის ან პრემიერ-მინისტრის გადაწყვეტილების გამო და არავითარ შემთხვევაში - ოკუპანტი ქვეყნის, ადგილობრივი სტალინელების, ანტი-ნატოელებისა და ვიდეო-შანტაჟისტების კოორდინირებული თუ დამთხვეული ულტიმატუმების ფონზე“, – ნათქვამია პარტიის განცხადებაში.

ამ ეტაპზე მთავრობაში სამი "რესპუბლიკელი" მინისტრია.

[ნინო ნარიმანიშვილი, ახალციხე]