„რესპუბლიკური პარტია“ ახალციხეში თავმჯდომარემ და წევრებმა დატოვეს

ქალაქ ახალციხის საკრებულოს თავმჯდომარემ თამარ გოგოლაძემ პარტიიდან წასვლის შესახებ განცხადება 4 ნოემბერს დაწერა.

„მიზეზებზე არ ვსაუბრობ. ვიყავი „რესპუბლიკური პარტიის“ ეროვნული კომიტეტის წევრი მეოთხედ არჩეული ყრილობის მიერ. 10 წელი შესრულდა რაც პარტიაში ვარ. მე არ ვაპირებ პოლიტიკური ცხოვრება შევწყვიტო, აუცილებლად მივიღებ გადაწყვეტილებას“, – ამბობს უკვე ყოფილი „რესპუბლიკელი“ თამარ გოგოლაძე, რომელიც 2006 წლიდან 2014 წლის თებერვლამდე პარტიის ახალციხის რაიონული ორგანიზაციის თავმჯდომარე იყო.

ასევე 4 ნოემბერს დატოვა პარტია თამარ გოგოლაძის შემდეგ არჩეულმა ორგანიზაციის თავმჯდომარემ იოსებ კაპანაძემ: „ასე ჩავთვალე საჭიროდ. ჯერჯერობით უპარტიო ვიქნები“.

პარალელურად, „რესპუბლიკური პარტია“ დატოვეს ქალაქ ახალციხისა და თვითმმართველი თემის, ახალციხის მუნიციპალიტეტის საკრებულოს დეპუტატებმა.ქალაქში ორი, თემში, კი სამი რესპუბლიკელი დეპუტატი იყო. შედეგად, თვითმმართველი თემის საკრებულოშუ არსებული „რესპუბლიკელების“ფრაქცია დაიშალა.

თამარ გოგოლაძის განცხადებით, ბოლო რამდენიმე დღეში „რესპუბლიკური პარტია“ დაახლოებით 20–მდე წევრმა დატოვა. პარტიაში ამ დროისთვის დაახლოებით 60 აქტიური წევრი იყო. რა გადაწყვეტილებას მიიღებენ დანარჩენები, ამ ეტაპისთვის უცნობია.

შეგახსენებთ, 29 ოქტომბერს, „რესპუბლიკური პარტია“ დატოვა საქართველოს პარლამენტის უკვე ყოფილმა თავმჯდომარემ, დავით უსუფაშვილმა. ამ გადაწყვეტილების მიზეზად მან პარტიის სხვა ლიდერებთან ხედვების შეუთავსებლობა დაასახელა. პარტია ასევე დატოვეს: თენგიზ შერგელაშვილმა, ფრიდონ საყვარელიძემ, პაატა ზაქარეიშვილმა, ვახტანგ ხმალაძემ და თინა ხიდაშელმა.

[თინათინ ზაზაძე, ახალციხე]