2016 წელს ქალაქის შიდა გზებისთვის 178.490 ლარია გათვალისწინებული

2016 წელს ქალაქ ახალციხის მუნიციპალიტეტში შემავალი საავტომობილო გზების შეკეთების (მოვლა-შენახვის) სამუშაოებზე ტენდერი ახალციხის მერიამ გასული, 2015 წლის დეკემბერში გამოაცხადა. ტენდერში მხოლოდ შპს "ოცხე" მონაწილეობდა. კომპანიამ ტენდერი 178.490 ლარით მოიგო.

სატენდერო დოკუმენტაციის მიხედვით, შპს "ოცხე" ვალდებულია მთელი წლის განმავლობაში იზრუნოს ქალაქის შიდა, საავტომობილო გზებზე.

მის მოავლეობებში შედის დაზიანებული ასფალტო – ბეტონის საფარის ორმული შეკეთება და სასურათე შეკეთება ორფენიანი აასფალტო – ბეტონის საფარის მოწყობით. "ოცხეს" მოვალეობებში შედის ასევე, ტროტუარებისა და ბორდიურების შეკეთება, სკვერებში და ტროტუარებზე დაზიანებული ქვაფენილების დემონტაჟი და ახალის მოწყობა, სტანდარტული ზომის ახალი საგზაო ნიშნების მონტაჟი, თუჯის დაზიანებული ცხაურების მოხსნა და ახალი თუჯის ცხაურების მოწყობა, ლითონის დაზიანებული ცხაურების მოხსნა და ახალი ცხაურების მოწყობა შეღებვით, ლითონის დაზიანებული ცხაურების მოხსნა და ახალი თუჯის ცხაურების მოწყობა, ასევე, ზამთრის პერიოდში 20%-იანი ქვიშა-მარილის (ფრაქცია 0,5) მოყრა სავალ ნაწილზე ავტომანქანით, პარაპეტების და ხიდის მოაჯირების შეღებვა და ზამთრის პერიოდში ქუჩების გაწმენდა თოვლის საფარისაგან.

"ხელშეკრულების მიხედვით, ეტაპობრივად ხდება ქალაქის საგზაო ინფრასტრუქტურის მოწესრიგება, თანხებიც შესრულებული სამუშაოების მიხედვით იხარჯება“, – ამბობს შპს "ოცხეს" მფლობელი იური მელიქიძე.

მისივე განმარტებით, მიმდინარე წელს, ზამთრის პერიოდში, თოვლისაგან გზების გაწმენდასა და ტექნიკური მარილის დაყრაში 26 000 ლარი დაიხარჯა. გზების ორმულ შეკეთებას კი, რაც ქალაქში ახლა ხდება, 15.000 ლარი მოხმარდება.

[ლუბა გიორგაძე, ახალციხე]