„ვეფხისტყაოსნის“ ზეპირად გადაცემის ტრადიცია არამატერიალური კულტურის ძეგლად აღიარეს

შესაბამის გადაწყვეტილებას ხელი დღეს, 1 ოქტომბერს მოეწერა. აღნიშნულთან დაკავშირებით, სამცხე–ჯავახეთის სახელმწიფო უნივერსიტეტს საქართველოს კულტურული მემკვიდრეობის დაცვის ეროვნული სააგენტოს წარმომადგენლები სტუმრობდნენ.

„ვეფხისტყაოსნის“ ზეპირად გადაცემის ტრადიციის არამატერიალური კულტურის ძეგლად აღიარება სამცხე–ჯავახეთის სახელმწიფო უნივერსიტეტის, ფილოლოგიის სპეციალობის 7 სტუდენტისა და მეცნიერებათა დოქტორის ნესტან სულავას ინიციატივა იყო.

სტუდენტებმა პროექტზე მუშაობა მიმდინარე წლის მაისში დაიწყეს.

საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის მოადგილე დავით ლომიტაშვილი ამბობს, რომ სააგენტოსა და სამცხე–ჯავახეთის უნივერსიტეტის თანამშრომლობა სამომავლოდ კულტურული მემკვიდრეობის დაცვის საქმეში კარგ შედეგებს მოიტანს: „ამ 7 გოგონას გამარჯვება არის ერთგვარი სტიმული სხვა სტუდენტებისთვის“.

[თეონა თაბუნიძე, ახალციხე]