დატბორილი სკვერი [Photo]

თამარაშვილის #25-ში მცხოვრები მოსახლეობა ამბობს, რომ სკვერიდან გადმოსული წყალი მთელ ქუჩაზე გადმოდის. მას შემდეგ, რაც ტემპერატურა დაეცა და ყინვები დაიწყო, გზაზე გადაადგილება ავტომანქანებსაც უჭირთ.

”წყალი მთელ გზაზე გადმოდის, ქუჩაზე გადასვლა შეუძლებელია. იმის გამო, რომ სასმელი წყლის დიდი ნაწილი სკვერში იღვრება, მაღლა სართულებზე აღარც ადის”, - ამბობს ირა აკოფიანი.

მოსახლეობა ფიქრობს, რომ სასმელი წყლის მილი მას შემდეგ დაზიანდა, რაც ქუჩაზე საკანალიზაციო მილების ჩასაწყობად ტექნიკამ იმუშავა.

”ათი დღეა წყალი ამოდის. ჯერ არავინ მოსულა გასაკეთებლად. კანალიზაციას რომ აკეთებდნენ, მაშინ დაზიანდა მილი რამდენიმე ადგილას”,-ამბობს ბესიკ ველიჯანაშვილი.


ახალციხის გაერთიანებული წყალმომარაგების კომპანიაში ამბობენ, რომ აღდგენითი სამუშაოები მომავალი კვირიდან დაიწყება. რადგან წყალი სკვერის ტერიტორიაზე ამოდის, ამისთვის გამგეობიდან სამუშაოს დასაწყებად ნებართვა იყო საჭირო.

”ნებართვა უკვე მიღებული გვაქვს, რადგან უქმე დღეები ემთხვევა, სამუშაოებს მომავალი კვირიდან დავიწყებთ. არ ვიცით რა არის დაზიანებული, ადგილობრივები ამბობენ, რომ სკვერში სარწყავი მილებია ჩადებული. დაზიანების მიზეზს გათხრის შემდეგ დავადგენთ”,- განმარტავს ახალციხის სერვისცენტრის მენეჯერი გიორგი დალალიშვილი.

სკვერში წყალი მწვანე საფარის ქვემოდან ამოდის. წყალმომარაგების კომპანიაში არ გამორიცხავენ, რომ დაზიანება ბეტონის ქვეშ იყოს და ბეტონის საფარის აყრაც მოუხდეთ.



[თინათინ ზაზაძე, ახალციხე]