ჩაჭრილი სტუდენტების ბედი

ბიზნეს ადმინისტრირების ფაკულტეტის ეკონომიკის მიმართულების პირველი კურსის სტუდენტი გვეუბნება, რომ წინა სემესტრში ერთი საგნის, ეკონომიური აზრის ისტორიის ჩაბარება გაუჭირდა: „ალბათ იმიტომ, რომ გართობას მეტი დრო დავუთმე, სწავლით კი ნაკლებად ვსწავლობდი“.

სამ საგანში ჩაიჭრა ამავე ფაკულტეტის მეორე კურსის სტუდენტი: ინგლისურში, ბუღალტრულ აღრიცხვასა და მენეჯმენტში.

„გამოცდების ჩაბარება სამუშაოს და დროის უქონლობის გამო გამიჭირდა, ლექციებსა და სემინარებზე ვერ დავდიოდი“, – ამბობს იგი.

უყურადღებობას აბრალებს ერთ საგანში ჩაჭრილი მომავალი ჟურნალისტი: „მახსოვდა, რომ კომპიუტერმა მაღალი ქულა დამიწერა, მაგრამ ფაქტი სხვანაირი აღმოჩნდა, საგანი ჩამრჩა“.

უნივერსიტეტში 1215 სტუდენტი სწავლობს. სტუდენტები გამოცდებს ყველა სემესტრის ბოლოს აბარებენ.

განათლების, ჰუმანიტარულ და სოციალურ მეცნიერებათა ფაკულტეტის სპეციალისტი ლაურა თარხნიშვილი ამბობს, რომ სტუდენტები გამოცდებს კომპიუტერთან, ტესტირებით ან წერით აბარებენ. კომპიუტერით ჩაბარებული გამოცდის პასუხს სტუდენტი გამოცდის დამთავრებისთანავე იგებს, წერითის კი მას შემდეგ, რაც პედაგოგი მის ნაშრომს გაასწორებს. ერთ სემესტრში სტუდენტს 6 გამოცდის ჩაბარება უწევს.

პირველი სემესტრის საბოლოო გამოცდები 11იანვრიდან დაიწყო და 25 იანვრამდე გაგრძელდა. მათ, ვინც ამ დროს რომელიმე საგანი ვერ ჩააბარა, ან გადაუხდელობის გამო სტატუსი ჰქონდა შეჩერებული, გამოცდაზე განმეორებით გასვლა 15 თებერვლიდან 19 თებერვლამდე შეეძლო. გამოცდები უკვე დასრულდა და უნივერსიტეტმა შედეგებიც დაითვალა.

სამცხე–ჯავახეთის სახელმწიფო უნივერსიტეტის ხარისხის მართვის სამსახურის უფროსი ნუნუ ჟუჟუნაძე გვიხსნის, რომ 2015–2016 სასწავლო წლის პირველ სემესტრში ერთი ან რამდენიმე საგნის ჩაბარება, ჯამში სტუდენტთა დაახლოებით 5%–ს გაუჭირდა. თუმცა, მისივე თქმით, გასულ წელთან შედარებით ეს მაჩვენებელი შემცირებულია.

როგორც უნივერსიტეტში გვიხსნიან, მათ, ვინც ამ ორ მცდელობაზე გამოცდა ვერ ჩააბარა, ანუ, ვისაც რომელიმე საგანი „ჩარჩა“, გამოცდაზე გასვლა ისევ შეუძლიათ. მათ საგანი თავიდან უნდა გაიარონ, მომდევნო სასაწავლო წლის იმავე სემესტრში და ამისთვის თანხაც უნდა გადაიხადონ. ერთი ვერჩაბარებული გამოცდის საფასური 145 ლარია.

„დაწერს ჩაჭრილი სტუდენტი განცხადებას და ჩვეულებრივად, სხვა ბავშვებთან ერთად გაივლის საგანს. თნხას კი გამოცდების წინ გადაიხდის“, – განმარტავს ლაურა თარხნიშვილი.

თუ სტუდენტი იმავე საგანში ისევ ჩაიჭრება, მას 2–ჯერ გადაბარების უფლება აქვს, იგივე პირობებით. თუ რომელიმე კონკრეტულ მიმართულებაზე ჯგუფი არ გაიხსნა და შესაბამისად, ჩაჭრილ სტუდენტს ჯგუფთან ერთად საგნის თავიდან გავლის შესაძლობლობა არ აქვს, ის გამოცდისთვის ინდივიდუალურად უნდა მოემზადოს და ინდივიდუალურად ჩააბაროს.

[ნათია გულიაშვილი, ახალციხე]