შეცვლილი საგამოცდო სისტემა

სამცხე-ჯავახეთის სახელმწიფო სასწავლო უნივერსიტეტის სასწავლო პროცესის მართვის სამსახურის უფროსი ნიკოლოზ ახალკაცი გვიხსნის, რომ მეორე სემესტრიდან სტუდენტები როგორც პროფესიული, ასევე არჩევითი საგნის დასკვნით გამოცდებს გამოცდების ეროვნულ ცენტრს ელექტრონული პროგრამით ჩააბარებენ: ”საგამოცდო საკითხებში მინიმუმ 200 ტესტი იქნება. ყველა სტუდენტს განსხვავებული კითხვები შეხვდება”.

საგნის გამსვლელი ქულა 51 იქნება. მათ, ვინც ბარიერს ვერ გადალახავს, გამოცდის თავიდან ჩაბარება შეეძლებათ. იმ შემთხვევაში თუ საგამოცდო ბარიერს მეორე ცდაზეზ ვერ გადალახავენ, კრედიტის გადახდა მოუწევთ.

მომდევნო სემესტრიდან ყურადღება მიექცევა დასწრების ქულასაც, რომელიც კვლავ შევა შეფასების სისტემაში. შუალედური გამოცდები როგორც ზეპირი, ასევე ტესტური გამოცდის სახით ჩატარდება. რა საგანი რა ფორმით ჩატარდება, ამას საგამოცდო ცენტრი გადაწყვეტს.

სტუდენტთა მოსაზრებები ცვლილებებთან დაკავშირებით ორად იყოფა. ნაწილი ფიქრობს, რომ დასქრებას ყუარდღება აუცილებლად უნდა მიექცეს.
”კარგია თუ დასწრების ქულა ისევ შევა შეფასების სისტემაში. ვფიქრობ, რომ თავისუფალმა დასწრებამ სტუდენტების ნაწილი გააზარმაცა”, - გვეუბნება ჰუმანიტარულ მეცნიერებათა ფაკულტეტის მესამე კურსის სტუდენტი მარიამ გელაშვილი და აქვე ამატებს, რომ დადებითი მხარე აქვს ელექტრონულ გამოცდებსაც, - ”პასუხებს მაშინვე გავიგებთ და ლოდინი აღარ მოგვიწევს”.

ამავე ფაკულტეტის მესამე კურსის სტუდენტი ირაკლი ელბაქიძე, კი ფიქრობს, რომ დასწრების ქულა შეფასების სისტემაში არ უნდა შედიოდეს.
”დასწრება თავისუფალი უნდა იყოს. შესაძლებელია უნივერსიტეტის გაცდენა ზოგჯერ გარკვეული მიზეზების გამო მომიხდეს, ეს კი საწავლო ქულაზეც აისახება. ვისაც სწავლა უნდა, ისედაც ისწავლის”, - ამბობს იგი.

[ნინო გოგოლაძე, ახალციხე]