სამცხე–ჯავახეთის უნივერსიტეტში სერვერის დაწვის გამო სტუდენტები გამოცდებს ხელახლა აბარებენ

დღეს, 22 იანვარს დილიდან სამცხე–ჯავახეთის სახელმწიფო უნივერსიტეტში ბაკალავრიატის სტუდენტებმა გამოცდების ჩაბარება ახალი განრიგით დაიწყეს. ის რაც ელექტრონულად უკვე ჩააბარეს, ახლა წერილობით აბარებენ. უნივერსიტეტში რვა იანვრიდან 15 იანვრამდე ჩაბარებული ვერცერთი გამოცდის შედეგების აღდგენა ვერ მოხერხდა.

„შაბათი–კვირაც მუშაობდნენ ჩვენი საგამოცდო ცენტრის თანამშრომლები, მაგრამ ვერაფერი გადაარჩინეს. ამიტომ გამოცდების ახალი ცხრილი შევადგინეთ. ის ტესტები, რაც ელექტორნულად ბარდებოდა, ამოვბეჭდეთ და სტუდენტებს 30 კითხვაზე პასუხის გასაცემად იგივე დრო, ნახევარი საათი აქვთ“, – ამბობს სამცხე–ჯავახეთის სახელმწიფო უნივერსიტეტის რექტორის მოადგილე სასწავლო დარგში ნიკო ახალკაცი.

მისივე თქმით, თუ რომელიმე სტუდენტი გამოცდაში ჩაიჭრება, მას ჩვეულებრივ მეორედ გასვლის უფლება ისევ ექნება.

უნივერსიტეტში გამოცდები შაბათს, 27 იანვარს დასრულდება.

„მომავალი გამოცდებისთვის კი ის რაც ელექტრონულად ჩაბარდება, დაზღვევის მიზნით ე.წ. გარე მეხსიერებაზეც ჩაიწერება. მაქსიმალურად ვეცდებით, რომ მსგასვი ტექნიკური პრობლემა აღარ შეიქმნას“, – აცხადებს ახალკაცი.

შეგახსენებთ, რომ უნივერსიტეტში სერვერი 15 იანვარს, დღის მეორე ნახევარში გადაიწვა და ამ დროისთვის 30 კომპიუტერზე მიმდინარე ელექტრონული გამოცდა შეწყდა. უნივერსიტეტში გამოცდების ჩაბარება სტუდენტებმა რვა იანვარს დაწყეს. ამ დღიდან 15 იანვრამდე გამოცდები ელექტრონულად მხოლოდ ბაკალავრიატის 1200–მდე სტუდენტს უნდა ჩაებარებინა, თუმცა ყველა გამოცდა ყველა სტუდენტს ჯერ გავლილი არ ჰქონდა.

[თამუნა უჩიძე, ახალციხე]