მერია წყორძაში ხანძრით დაზარალებულ ოჯახს 2 000 ლარით დაეხმარა

ახალციხის მუნიციპალიტეტის მერიაში ამბობენ, რომ დაზარალებული ოჯახის მიმართვის შემდეგ, მათმა წარმომადგენლებმა ზარალი შეისწავლეს და თანხა უკვე ჩარიცხულია: „ბენეფიციარს გაეწია სოციალური გაცემის წესის თანახმად ფულადი დახმარება თანხის მაქსიმალური ოდენობით“.

წყორძაში ხანძარი 24 სექტემბერს, დაახლოებით 16:00 საათზე გაჩნდა. ცეცხლი პირველად ოჯახის დიასახლისმა შენიშნა. საყოფაცხოვრებო ნივთებთან და ბოსელთან ერთად, დაიწვა თივის 400 „პრესი“ და ხის მასალა, რომელიც საქონლის სადგომის გადასახურად სჭირდებოდათ.

მერის წარმომადგენლის განცხადებით, ცუცქირიძეების ოჯახის ზარალმა 10 000 ლარამდე შეადგინა.

საქმეზე ძიება სსკ–ს 187–ე მუხლის მეორე ნაწილის „ა“ ქვეპუნქტით მიმდინარეობს, რაც ცეცხლის წაკიდებით ნივთის დაზიანებას გულისხმობს.

[ლუბა გიორგაძე, ახალციხე]