ხმაურიანი ვაკანსია

ახალციხის მუნიციპალიტეტის გამგებლის პოსტი 22 ნოემბრიდან ვაკანტურია. ამ დროისთვის საკრებულოს ბიუროში 11 განცხადებაა შესული. გამგებლის პოზიციაზე პრეტენზიას შემდეგი კანდიდატები გამოთქვამენ: ბესიკ ბლიაძე, თამარ გოგოლაძე, ჯიმშერ გოგოლაური, დავით სამსონიძე, იოსებ მარტინენკო, ზაზა ხუციშვილი, რომან გოგოლაური, ნელი ღონღაძე, ბესიკ ხითარიშვილი, შალვა გოგოლაძე და ოლეგი ძოწენიძე.

სახალხო კრების წევრის ლაშა ამირეჯიბის ინფორმაციით, ახალციხის მუნიციპალიტეტის გამგებლად ბესიკ ხითარიშვილს ნიშნავენ, რომელიც 2004-2008 წლებში შს სამინისტროს ოპერატიულ-ტექნიკური დეპარტამენტის II სამმართველოს უფროსი იყო. ამ განყოფილების საქმე კი ფარული, ვიდეო-აუდიო და საფოსტო გზავნილების გაკონტროლება იყო.

„რატომ ნიშნავენ კუდის თანამშრომლებს, გურამ დონაძის მეგობარს და ამირან მესხელის პროტეჟეს, ჩემთვის გაურკვეველია. ამიტომაც, მივმართავ მოსახლეობას, არ დაუშვან ასეთი კადრები ხელისუფლებაში“, - განუცხადა ამირეჯიბმა „სამხრეთის კარიბჭეს“ სატელეფონო საუბარში.

მისივე მტკიცებით, ხითარიშვილი შინაგან საქმეთა მინისტრის მოადგილის გელა ხვედელიძის პროტეჟეა. ხვედელიძე წინასაარჩევნოდ „ქართულ ოცნებაში“ რეგიონალური სამსახურის უფროსი იყო და ბიძინა ივანიშვილის ნდობით აღჭურვილი პირია: „მისი ძმა, გია ხვედელიძე რომ ჩარეულია, ეს პირდაპირ შემიძლია ვთქვა. ძალიან უნდა, რომ ეს კაცი დაინიშნოს. ბიძინა ივანიშვილი არ არის საქმის კურსში და გარწმუნებთ, რომ აუცილებლად გაიგებს ამას“.

ახალციხის მუნიციპალიტეტის საკრებულოს თავმჯდომარე ოლეგ სანდროშვილი გამგებლის ვინაობას არ აკონკრეტებს. მისი განცხადებით, გამგებლის პოსტზე 11 განცხადებაა შესული: "ვინ იქნება გამგებელი სხდომაზე გაიგებთ".

ამირეჯიბის მტკიცებას კატეგორიულად უარყოფს თავად ბესიკ ხითარიშვილიც: „მე ისეთივე პრივილეგიებით ვსარგებლობ, როგორც დანარჩენი კანდიდატები. საკრებულოს გადასაწყვეტია ვინ იქნება მუნიციპალიტეტის გამგებელი“.

ხითარიშვილი კატეგორიულად უარყოფს იმ მოსაზრებასაც, რომ იგი ხვედელიძის კადრია. „სრული სიცრუეა“, - აცხადებს იგი.

ბოლო ინფორმაციით, საკრებულოს სხდომა ხვალისთვისაა დანიშნული.

[ნინო ნარიმანიშვილი, ახალციხე]