ადიგენში ბეგლარ ქამაშიძეს ელოდებიან

ბოლო ინფორმაციით, სოფელ ადიგენში მდგომარეობა სტაბილურია. ვითარებას ისევ აკონტროლებენ სამართალდამცველები, რომლებიც სოფლის სხვადასხვა მხარეს შეკრებილ მუსლიმებსა და ქრისტიანებს შორის დგანან.

ამ დროისთვის სოფელში იმყოფება ჭულეს მონასტრის წინამძღვარი მამა ანთიმოზი, თუმცა, ამ ეტაპზე საუბრისგან თავს იკავებს. მას სამცხე–ჯავახეთის მუფთი მამუკა ვაშაყმაძე და ჭელის მეჩეთის წინამძღვარი ჯამბულ აბულაძე ესაუბრებიან.

შეგახსენებთ, სოფელ ადიგენში მუსლიმები მეზობელი სოფლებიდანაც ჩამოვიდნენ. მუსლიმი თემი ითხოვს შესრულდეს რელიგიის სააგენტოს რეკომენდაცია და გამოიყოს ადგილი მუსლიმების სასაფლაოსთვის. ქრისტიანები კი მათ მოთხოვნას ეწინააღმდეგებიან იმ მოტივით, რომ სასაფლაოზე მოგვიანებით მუსლიმები მეჩეთსაც ააშენებენ.

სოფელში იმყოფებიან ადგილობრივი ხელისუფლების წარმომადგენლებიც, რომლებიც მხარეებს მოლაპარაკებას სთავაზობენ.

[თამუნა უჩიძე, ნინო ნარიმანიშვილი, ადიგენი]