დასავლეთ საქართველოს მუფთი ჭელაში მუსლიმებს ხვდება

ბეგლარ ქამაშიძე სოფელ ჭელას დაახლოებით 20:00 საათზე ესტუმრა. ადგილობრივებთან ერთად, მუფთს დახვდნენ სამცხე–ჯავახეთის მუფთი მამუკა ვაშაყმაძე და ჭელის მეჩეთის წინამღვარი ჯამბულ აბულაძე.

ბეგლარ ქამაშიძე შეხვედრაზე ისე შევიდა, რომ მედიასთან კომენტარი არ გაუკეთებია.

შეგახსენებთ,სოფელ ადიგენში მცხოვრები მუსლიმები სასაფლაოსთვის ტერიტორიის გამოყოფას ითხოვენ. მათ მოთხოვნას ადგილობრივი ქრისტიანები ეწინააღმდეგებიან.

ადიგენის მუნიციოალიტეტის გამეგებელი, რომელიც დღეს მუსლიმებსა და ქრისტიანებს შორის მედიაციას ცდლობდა, მუსლიმებს სთავაზობს, რომ გაფართოვდეს სოფლის სასაფლაოს ტერიტორია, იყოს ერთად ქრისტიანების სასაფლაოც და მუსლიმებისაც, ოღონდ გამოყოფილად.
მუსლიმები ამ მოთხოვნაზე თანახმა არიან.

დღეს ადიგენში შეკრებილები მას შემდეგ დაიშალნენ, რაც გამგებელმა მამუკა ვაშაყმაძეს აცნობა, რომ სასაფლაოსთვის ტერიტორია გამოიყოფა.
რაზე საუბრობენ ჭელის მეჩეთში შეკრებილები, ამ დრომდე უცნობია. „სამხრეთის კარიბჭე“ ადგილზე რჩება და შეხვედრის დასრულებას ელოდება.

ამ დროისთვის სიმშვიდეა სოფელ ადიგენში. იქ აღარც მუსლიმები არიან შეკრებილი და აღარც ქრისტიანები. სოფელი დატოვა სამართალდამცავთა უმრავლესობამაც, თუმცა, მათი ნაწილი პატრულირების მიზნით მაინც რჩება.

შეგახსენებთ, ადიგენში ვითარება დღეს დილიდან დაძაბული იყო. ადიგენში მომხდარ დაპირისპირებაზე შინაგან საქმეთა სამინისტრო გამოძიებას 156–ე მუხლის 1–ლი ნაწილით იკვლევს, რაც გულისხმობს ადამიანის დევნას სიტყვის, აზრის, სინდისის, აღმსარებლობის, რწმენის ან მრწამსის გამო, ანდა მის პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებით. ადიგენში მომხდარს სწავლობს საქართველოს სახალხო დამცველის აპარატიც.

[თამუნა უჩიძე, თინათინ ზაზაძე, ადიგენი]