მეუფე თეოდორე: ეკლესია გმობს და ემიჯნება ყოველგვარ ძალადობრივ ქმედებას

მეუფე თეოდორემ ადიგენში არსებულ ვითარებაზე საპატრიარქოს ტელევიზია „ერთსულოვნების“ ეთერში ისაუბრა. მისი განცხადებით, ეკლესია გმობს და ემიჯნება ყოველგვარ ძალადობრივ ქმედებას. მღვდელმთავარმა საუბრისას აღნიშნა, რომ ეკლესია არ ყოფილა ჩართული ამ საკითხის მოგვარებაში.

„მუსლიმი მოსახლეობა ითხოვდა ცალკე სასაფლაოს გამოყოფას, მართლმადიდებელი მოსახლეობა წინააღმდეგი იყო, რომ ცალკე სასაფლაო გამოყოფილიყო და ამაზე მიდიოდა დიალოგი, კამათი. როგორც ვიცი, დიდი ხანია ეს გრძელდება, თითქოს მიღწეული იყო კიდეც რაღაც შეთანხმებები, მაგრამ გუშინ რაღაცა პროვოკაცია მოახდინეს, არ ვიცი ვინ, მაგრამ გარკვეულმა ჯგუფებმა და ამ პროვოკაციის შედეგად მოხდა დაპირისპირება“, – განაცხადა მეუფე თეოდორემ.

მეუფემ აღნიშნა, რომ მისთვის ცნობილია, რომ ამ საქმეზე დაწყებულია გამოძიება, თუმცა, მნიშვნელოვანია, რომ გამოიძიონ არა მხოლოდ ეს კონკრეტული ფაქტი: „არა მხოლოდ და მხოლოდ ეს საკითხი უნდა იყოს გამოძიებული, გამოძიებული უნდა იყოს ის პროვოკაციები, რამაც გამოიწვია ასეთი დაპირისპირებები, რათა თავიდან ავიცილოთ მსგავსი პრობლემები და მსგავასი ვითარება“.

მეუფე თეოდორე მხარეებს მოლაპარაკების მაგიდასთან დასხდომას სთავაზობს.

„გამოვარჩიოთ სოფლიდან როგორც მართლმადიდებელი მოსახლეობიდან რამოდენიმე ადამიანი, ასევე მუსლიმი მოსახლეობიდან. ჩავერთვებით ჩვენ, ეპარქიის წარმომადგენლობა, ჩაერთოს სამუფთო, სახელმწიფოს წარმომადგენლები, დავსხდეთ ერთად და შევეცადოთ ვიპოვოთ წყნარი გამოსავალ. მაქსიმალურად შევეცადოთ, რომ არ მივცეთ პროვოკატორებს საშუალება დაძაბონ ურთიერთობა მართლმადიდებლებსა და მუსლიმებს შორის“, – განაცხადა მეუფე თეოდორემ და დასძინა, რომ ახალციხისა და ტაო–კლარჯეთის ეპარქიას კარგი თანამშრომლობა აქვს მუსლიმური მრევლის წინამძღვრებთან, მუფთებთან, – „ჩვენ ვთანამშრომლობთ სხვადასხვა სახკითხებში, ახლაც ვისაუბრე ჯავახეთის მუფთთან და ვფიქრობ, რომ ჩვენ ერთობლივი ძალებით შევძლებთ სიმშვიდე შევიტანოთ სოფლის მოსახლეობაში“.

შეგახსენებთ, ორი დღის განმავლობაში, 29 თებერვალს და 1 მარტს, სოფელ ადიგენში ადგილობრივი მუსლიმები და ქრისტიანები სასაფლაოს ადგილის გამო ერთმანეთს უპირისპირდებოდნენ.

[ნინო ნარიმანიშვილი, ახალციხე]