მოხეს მართლმადიდებელი მოსახლეობა: ‘ამ მოვლენებში “ნაციონალები” შეინიშნებიან’

ახალციხისა და ტაო-კლარჯეთის მიტროპოლიტის მეუფე თეოდორეს რეზიდენციას დღეს მოხის მართლამადიდებელი მოსახლეობა სტუმრობდა. მათი თანდასწრებით გამართა ბრიფინგი მეუფე თეოდორემ.

ბრიფინგის დასრულების შემდეგ, ადგილობრივებმა ჟურნალისტებთან მოხეში, მუსლიმების სადავო შენობაში ლოცვა შეაფასეს.

„უკვე მეოთხე დღეა, მუსლიმი მრევლი ამ შენობაში შედის და ლოცვას აღავლენს. მათ აქვთ სხვა მეჩეთი სოფელში და იქ ლოცვას არავინ უშლის. ჩვენ მეუფისა და მამა ნიკოლოზის მოწოდებით პროვოკაციაზე არ წავსულვართ და არც ვაპირებთ“, - ამბობს მოხის მკვიდრი ბესიკ ჩაგელიშვილი.

იგი მუსლიმ მოსახლეობას სადავო შენობაში ლოცვის შეწყვეტისაკენ მოუწოდებს, იქამდე, ვიდრე მისი წარმომავლობა არ დადგინდება
სოფელ მოხის მართლმადიდებელი მოსახლეობა ამბობს, რომ ბოლო ოთხი დღის განმავლობაში მომხდარი მოვლენები მმართულია და ამაში „ნაციონალურ მოძრაობას“ ადანაშაულებენ.

‘შეიძლება ეს იყოს არჩევნებთან დაკავშირებული, მოხეში „ნაციონალები შეინიშნებიან“, -ამბობს ლევან რეხვიაშვილი.

ამ პროცესებში, „ნაციონალური მოძრაობის“ მონაწილეობას კატეგოროიულად უარყოფს ახალციხე-ადიგენში „ნაციონალური მოძრაობის“ დეპუტატობის კანდიდატი ვაჟა ჩიტაშვილი.

მისი თქმით, რელიგიურ თემებზე პოლიტიკური სპეკულაციები არ შეიძლება და ყველა მხარეს სიმშვიდისაკენ მოუწოდებს: „შექმნილია სპეციალური კომისია და ამ შენობის წარმომავლობას სწავლობს, ამიტომ გადაწყევტილების მიღებამდე, ყველა მხარემ თავი უნდა შეიკავოს სიტუაციის დაძაბვისაგან“.

შეგახსენებთ, რომ მუსლიმმა მოსახლეობამ მოხის სადავო შენობაში ლოცვა 4 დღის წინ დაიწყო, დღეს კი სამართლადამცველებმა შენობის კარი აჭედეს. დღესვე საგანგებო პრესკონფერენცია გამართა ახალციხისა და ტაო-კლარჯეთის მიტროპოლიტმა მეუფე თეოდორემ, რომელმაც ადგილობრივ და ცენტრალურ ხელისუფლებას მოუწოდა ყველაფერი გააკეთონ, რათა თავიდან იქნას აცილებული ძალადობა და დაპირისპირება ადიგენში.

[ლუბა გიორგაძე, ადიგენი]