რამდენიმეთვიანი წყვეტის შემდეგ, პარკში თავისუფალი WIFI ჩაირთო

გაზაფხულს ახალციხის ცენტრალური პარკი ისევ თავისუფალი, უკაბელო ინტერნეტით შეხვდება. WIFI ,რომელიც ზამთარში გათიშული იყო, უკვე ჩართულია.

ინტერნეტის პროვაიდერ კომპანია „დელტა – ნეტში“ ამბობენ, რომ ინტერნეტის მიწოდება მოკლე ჩართვის გამო შეწყდა.

“WIFI ქალაქში არსებულ ერთ–ერთ ობიექტზე დამონტაჟდა. შენობა კერძო პირისაა, ამიტომ ჩვენ სპეციალური ნებართვა ავიღეთ მის დასაყენებლად. დაახლოებით სამი თვის წინ პრობლემა შეიქმნა და დროებით შეწყვეტილი იყო“, - ამბობს კომპანია „დელტა –ნეტის“ სამცხე–ჯავახეთის კოორდინატორი გიორგი კახნიაშვილი.

შენობა, რომელზეც WIFI -ს მოდემია დამონტაჟებული, გაქირავებულია. მასში სილამაზის სალონი, ბარი და საფუნთუშეა. ერთ–ერთი ობიექტის მეპატრონე ამბობს, რომ WIFI-ს დაყენებამ ელექტროენერგიასთან დაკავშირებით პრობლემები შეუქმნა: „ჩვენი დენის ხაზზე მიაერთეს, ძალიან ბევრი გადასახადი მოგვივიდა, ავდექით და ჩვენი ხელით გავთიშეთ“.

გიორგი კახნიაშვილი ამბობს, რომ ქალაქის მერიასთან შეთანხმებით, ამ ეტაპზე მოწყობილობა ახალ ხაზზეა მიერთებული და პრობლემები აღარ შეიქმნება.

ახალციხელი ახალგაზრდები პარკში თავისუფალი ინტერნეტის არსებობას მიესალმებიან.

„ჩემთან სახლში ხშირადაა დაკავებული ინტერნეტი, ამიტომ მოვდივარ ხოლმე აქ. მისი გათიშვა, რა თქმა უნდა, შევამჩნიე, მაგრამ მიზეზი დღემდე არ ვიცი“, – გვითხრა ერთ–ერთმა მომხმარებელმა.

შეგახსენებთ, ახალციხის ცენტრალურ პარკში WIFI გასული, 2015 წლის აპრილში დამონტაჟდა. მისი დამონტაჟებისას კომპანიაში განგვიცხადეს, რომ ინტერნეტი დამონტაჟების წერტილიდან 50–70 მეტრის რადიუსში ვრცელდება და 200–მდე მსურველს სარგებლობა 24 საათის განმავლობაში შეუძლია.

კომპანიაში განმარტავენ, რომ ამ დროისთვის ინტერნეტის პაკეტი არ შეცვლილა.

„მას, რა თქმა უნდა, ფილმების საყურებლად ვერ გამოიყენებთ, მაგრამ რაიმე ინფორმაციის გასაგებად, ან სოციალური ქსელებისთვის თავისუფლად მოიხმართ“, - ამბობს გიორგი კახნიაშვილი.

[ნათია გულიაშვილი, ახალციხე]