ოთხი თვეა ახალციხის პარკში უფასო wifi გათიშულია

„სექტემბრის შუა რიცხვებში გაითიშა. ხაზი დაზიანდა, ენერგო–პროს თანამშრომლები გვყავდა მიყვანილი, სავარაუდოდ მოკლე ჩართვა მოხდა და დაწვა აპარატურაც. ჩვენ ამ ეტაპზე სხვა პროექტს ვახორციელებთ. თბილისში ვიმყოფები, რომ ჩამოვალ ამ საკითხს ქალაქის მერიასთან ერთად გავივლით“, – ამბობს "დელტაკომის" სამცხე–ჯავახეთის კოორდინატორი გიორგი კახნიაშვილი.

მისი თქმით, დაზიანებული კაბელის აღდგენას დაახლოებით ორი კვირა დასჭირდება და თებრვლიდან ახალციხის პარკში უფასო wifi–თ ისევ ისარგებლებენ: „ზამთრის პერიოდში ისეც არ იყენებენ პარკში wifi–ს, მაგრამ ერთ თვეში ეს ყველაფერი მოწესრიგდება“, – ამბობს გიორგი კახნიაშვილი.

კითხვაზე, რატომ ვერ მოხერხდა ოთხი თვის განმავლობაში ამ პრობლემის მოგვარება, გიორგი კახნიაშვილი გვპასუხობს: „აღარ მივაქციეთ ყურადღება, ნაკლები იყო პარკში მსხდომი მოსახლეობა. დიდი სამუშაოებია ჩასატარებელი, მთელი აპარატურა თეატრის ტერიტორიაზე უნდა გადავიდეს, ჩვენ სხვა პროექტსაც ვახოროცელებთ. სულ ორი ჯგუფი გვყავს და ამისთვის ვერ მოვაცდენდით, რადგან მათ სხვადასხვა სოფლებში ინტერნეტი შეყავთ“.

შეგახსენებთ, რომ ახალციხის ცენტრალურ პარკში უფასო wifi–ს გათიშვის ეს პირველი შემთხვევა არ არის. რამდენიმე კვირით ინტერნეტი მაისშიც გაითიშა.

ცენტრალურ პარკში პარკში უფასო wifi 2015 წლის აპრილში დაამონტაჟეს. უფასო ინტერნეტით სარგებლობა პარკის ტერიტორიაზე 200–მდე მსურველს შეუძლია. ინტერნეტი დამონტაჟების წერტილიდან 50–70 მეტრის რადიუსში ვრცელდება. აღნიშნული სამუშაოები კომპანია "დელტაკომმა" შეასრულა.

[თინათინ ზაზაძე, ახალციხე]