ახალციხის პარკში უფასო wifi ერთი კვირაა გათიშულია

ახალციხის ცენტრალურ პარკში wifi აპრილის ბოლოს დაამონტაჟეს. უფასო ინტერნეტით სარგებლობა პარკის ტერიტორიაზე 200–მდე მსურველს შეუძლია. ინტერნეტი დამონტაჟების წერტილიდან 50–70 მეტრის რადიუსში ვრცელდება. აღნიშნული სამუშაოები კომპანია "დელტაკომმა" შეასრულა.

თუმცა, უკვე ერთი კვირაა მოსახლეობა უფასო ინტერნეტით ვეღარ სარგებლობს. "დელტაკომის" სამცხე–ჯავახეთის კოორდინატორის გიორგი კახნიაშვილის განმარტებით, დამონტაჟების დღიდან ერთი თვის განმავლობაში ინტერნეტი სატესტო რეჟიმში მუშაობს, ამიტომ გარკვეული ხარვეზები მოსალოდნელიც იყო.

"მაგისტრალურ ხაზზეა დაზიანება და ამაზე ვმუშაობთ ზუსტად ერთი კვირაა, დღეს თბილისიდან ჩამოგვყავს სპეციალისტების ჯგუფი, რომელიც ამ პრობლემების მოგვარებაზე იმუშავებენ და ეს ხარვეზი რამდენიმე დღეში გამოსწორდება", – ამბობს გიორგი კახნიაშვილი.

[თამარ თოთაძე, ახალციხე]