ახალციხეში გარეგანათების მეორე ეტაპი იწყება

ქალაქის ქუჩებში გარეგანათებას ტენდერში გამრჯვებული შპს „ერისიმედი“ 556 291 ლარად დაამონტაჟებს. ახალციხის მერიამ კომპანიასთან ხელშეკრულება 26 თებერვალს გააფორმა.

პროექტის ფარგლებში გარეგანათების სარეაბილიტაციო სამუშაოები განხორციელდება "უნიმედი სამცხეს" ახალციხის სამედიცინო დაწესებულებამდე მისასვლელ გზაზეც.

ადგილორივ თვითმმართველობაში განმარტავენ, რომ ახალი სისტემა მერიის შენობაში დამონტაჟებულ ეკონომსისტემის (სადისპეჩერო ) პუნქტს შეუერთდება, საიდანაც მთლიანი სისტემის მართვა ხდება.

"უახლოეს დღეებში დაიწყება გარე განათების დამონტაჟება. ეს არის თანამედროვე ტექნოლოგია,რომლის მართვაც კომპიუტერულად ხდება და ხელს უწყობს ელექტრო ენერგიის 35-40%-ით დაზოგვას",- ამბობს ახალციხის მერი გიორგი კოპაძე.

შეგახსენებთ, რომ პირველ ეტაპზე გარე განათების ახალი სისტემა ნათენაძის, ნებიერიძის, კოსტავას, ფარნავაზის, სულხან-საბას, კეცხოველის და დიდიმამიშვილის ქუჩებზე დამონტაჟდა. გარეგანათების მოსაწყობად თანხა ადგილობრივი ბიუჯეტიდან გამოიყო.

[sknews.ge]