'მესხური ფოლკლორის' პრეზენტაცია ბიბლიოთეკაში

ნაშრომი გაზეთ "ლიტერატურული მესხეთის" რედაქტორის, ავთანდილ ბერიძის ავტორობით გამოიცა.

„წიგნში თავმოყრილია ხალხური ზეპირსიტყვიერების ნიმუშები, ლექსები, აშუღური პოეზია, სახალხო მთქმელების შემოქმედება – ადგილობრივებში გავრცელებული ხალხური ზეპირსიტყვიერება, რომელიც მე–19–ე საუკუნიდან დღემდე პერიოდს მოიცავს. თავმოყრილია სამცხე–ჯავახეთში შეგროვილი მასალა“, – ამბობს წიგნის ავტორი ავთანდილ ბერიძე.

წიგნის გამოსაცემად დაახლოებით ხუთი წელი მუშაობდა. ეს პირველი ნაწილია. იგეგმება მეორე ნაწილის გამოცემაც.

„მეორე ნაწილში შევა ლექსები, თქმულებები, ლეგენდები, ზღაპრები, ანდაზები, წეს– ჩვეულებები, მესხური თამაშები და გამონათქვამები“, – ამბობს ავტორი.

„მესხურ ფოლკლორში“, რომელიც 900 გვერდიანია, დაახლოებით 400 ავტორის 3000– მდე ლექსია შესული.

წიგნი კულტურის სამინისტროსა და გაზეთ „ლიტერატურული მესხეთის“ ერთობლივი დაფინანსებით გამოიცა. ნაწილი უმაღლეს სასწავლებლებში, ბიბლიოთეკებსა და მუზეუმებში დარიგდა, ნაწილი კი გაყიდვაშია. საცალო ფასი 22 ლარია.

ავთანდილ ბერიძის ავტორობით 2008 წელს დაიბეჭდა წიგნი სახელწოდებით „ვწერ მესხი ვინმე მელექსე“, რომელშიც გადმოცემულია მესხეთში მოღვაწე თანამედროვე პროეტების შემოქმედება. ბერიძე უახლოეს პერიოდში მის მიერ დაწერილი ლექსების კრებულის გამოქვეყნებასაც გეგმავს.



[თინათინ ზაზაძე, ახალციხე]