ახალციხეში გაზეთ ‘ლიტერატურული მესხეთის’ საიუბილეო საღამო გაიმართა

„ლიტერატურული მესხეთის“ პირველი ნომერი 1999 წლის იანვარში გამოვიდა. მაშინ გაზეთი 2 500–იანი ტირაჟით დაიბეჭდა. როგორც დამფუძნებელი ავთანდილ ბერიძე ამბობს, მკითხველის გაზეთით დაინტერესება გაუჭირდათ და 2 500 ეგზემპლარიდან, მხოლოდ შვიდი ნომრის გაყიდვა შეძლეს: „წლების განმავლობაში გაზეთი დაიხვეწა და მკითხველისთვის მისაღები გახდა, დღეს ისევ 2 500 ეგზემპლარს ვავრცელებთ, ხელმომწერები საქართველოს თითქმის ყველა რეგიონში გვყავს“.

ბერიძის თქმით, მხატვრული ლიტერატურის გარდა გაზეთში თითქმის ყველა რელიგიის შესახებ სამეცნიერო სახის მასალებიც იწერება: „თითქმის ყველა ლიტერატურული ჟანრის ნაწარმოებს ვბეჭდავთ, განსაკუთრებული ადგილი კი ფოლკლორს და ისტორიულ თემატიკას უკავია. არის საპოლემიკო საკითხებიც. გაზეთი საზოგადოებრივ–პოლიტიკურია, თუმცა ჩვენ აპოლიტიკურები ვართ“.

გაზეთის დამფუძნებელი ამბობს, რომ ამ 20 წლის მანძილზე რეგიონში ბევრი ახალი პოეტი გამოჩნდა, მათ ლექსებს კი საზოგადოება პირველად ყოველთვის „ლიტერატურული მესხეთის“ ფურცლებიდან ეცნობა. მათ შორის ერთ–ერთია კობა მოდებაძე: „ამ გაზეთში ავიდგი ფეხი, შემოქმედებითად განვვითარდი და ახლა ის ჩემთვის ძალიან ძვირფასია. ლექსებს ტკბილ–მწარის ელდა მაწერინებს, დიდი სიხარული, ან ტკვილი, ყველაფერი განცდიდან და ბრძოლიდან მოდის“, – ამბობს 42 წლის პოეტი.



რაც შეეხება ლექსების კრებულს, რომლის პრეზენტაციაც გაზეთის იუბილესთან ერთად გაიმართა, ის ყველა იმ პოეტის შემოქმედებას აერთიანებს, ვისაც მესხეთზე დაუწერია. კრებული ლიტერატურული მესხეთის დამაარსებელმა ავთანდილ ბერიძემ შექმნა: „ბესიკიდან დაწყებული დღემდე, მესხეთის თემატიკაზე რაც კი რამ პოეტური შექმნილა, ყველაფერი შევიტანეთ ამ წიგნში. სულ 500 ეგზემპლარი გამოვეცით და უკვე სრულად გავავრცელეთ“.

საიუბილეო საღამოზე წიგნში შესული ლექსები კერძო სკოლა „მზექას“ მოსწავლეებმა წაიკითხეს. საღამოს ახალციხის მერიის, სკოლების და უნივერსიტეტის თანამშრომლები ესწრებოდნენ.



[ავთო ინასარიძე, ახალციხე]