მესხური ფოლკლორის შესახებ წიგნი გამოიცა

„მესხური ფოლკლორი“ საქართველოს კულტურისა და ძეგლთა დაცვის სამინისტროს მხარდაჭერით გამოიცა. ნაშრომში თავმოყრილია მესხური ფოლკლორი მე-19 საუკუნიდან დღემდე და აერთიანებს როგორც დღევანდელი სახალხო მთქმელების პოეზიას, ასევე აშუღური პოეზიის ნიმუშებს. წიგნის პრეზენტაცია კულტურის სამინისტროში შედგა.

კულტურის სამინისტროს ინფორმაციით, წიგნის შექმნის მიზნით, სამცხე-ჯავახეთის რეგიონში მცირე საველე ექსპედიციები ჩატარდა, შედგა შეხვედრები სოფლის უხუცეს და ფოლკლორით დაინტერესებულ ადამიანებთან, შეგროვდა საინტერესო მასალები, რომელიც მოძიებულია საქართველოს მუზეუმებში, სხვადასხვა არქივებში, უმაღლესი სასწავლებლების ფოლკლორის განყოფილებებში, ქართულ პერიოდულ გამოცემებსა და წიგნად ფონდებში.

პროექტის ავტორი გაზეთ „ლიტერატურული მესხეთის“ რედაქტორი ავთანდილ ბერიძეა.

წიგნის გამოცემა მიზნად ისახავს ქართული ზეპირსიტყვიერების საგანძურის შევსებას, მესხური ფოლკლორის გადარჩენასა და მის პოპულარიზაციას.

კულტურის სამინისტროში განმარტავენ, რომ წიგნი განკუთვნილია როგორც სამეცნიერო საზოგადოებისთვის, ასევე სტუდენტებისა და ფოლკლორით დაინტერესებული ადამიანებისთვის.

[თამარ თოთაძე, ახალციხე]