ეთნიკური უმცირესობების წარმომადგენელი ახალგაზრდების შემოქმედება ერთ კრებულში [Photo/Video]

„საქართველო ჩემი სამშობლოა" – ასე ჰქვია ლიტერატურულ კრებულს. მასში შესულია 2015 წელს გამოცხადებული კონკურსის შედეგად შერჩეული საუკეთესო ნაშრომები პოეზიის ნიჭით გამორჩეული, თბილისისა და საქართველოს სხვადასხვა რეგიონში მცხოვრები ეთნიკური უმცირესობების წარმომადგენელი ახალგაზრდების შესრულებით. კრებულის რედაქტორი ლევან ღვინჯილიაა.

კრებულის პრეზენტაცია გუშინ, 23 თებერვალს, საქართველოს სპორტისა და ახალგაზრდობის საქმეთა სამინისტროში გაიმართა.


სპორტისა და ახალგაზრდობის სამინისტროს ვიდეომასალა

პრეზენტაციას ესწრებოდნენ მინისტრის მოადგილე რევაზ ჯაველიძე, კრებულის რედაქტორი, პროგრამის კოორდინატორები ახალგაზრდული პოლიტიკის მართვის დეპარტამენტიდან, პროექტში მონაწილე ახალგაზრდები და სპეციალურად მოწვეული სტუმრები სხვადასხვა ორგანიზაციებიდან.

პრეზენტაციაზე საკუთარი ლექსები წაიკითხეს ქვემო ქართლში, მცხეთა-მთიანეთსა და სამცხე-ჯავახეთში მცხოვრებმა ახალგაზრდებმა. ასევე, გაიმართა შოთა რუსთაველის პოემის „ვეფხისტყაოსანი" აუდიო სპექტაკლის პრეზენტაცია, რომელიც სამინისტროს ინიციატივით ჩაიწერა DVD დისკებზე ქართულ, სომხურ და აზერბაიჯანულ ენებზე.

პროგრამას, რომლის მიზანია ხელი შეუწყოს ქვეყანაში ეთნიკური უმცირესობების საზოგადოებაში ინტეგრაციას, სამინისტრო 2012 წლიდან ახორციელებს.








კრებულის პრეზენტაცია სამინისტროში.
სპორტისა და ახალგაზრდობის საქმეთა სამინისტროს ფოტოები

[ნინო ნარიმანიშვილი, ახალციხე]