რუსეთის წამყვანი ტურ-ოპერატორები ბორჯომ–ბაკურიანში

როგორც ბორჯომის მუნიციპალიტეტის მიერ გავრცელებულ განცხადებაში ვკითხულობთ, ტურ–ოპერატორების დაინტერესების სფეროს ძირითადად წარმოადგენდა საქართველოს სამთო–სათხილამურო კურორტები. ჯგუფი გაეცნო ბორჯომისა და ბაკურიანის ინფრასტრუქტურას (სასტუმროებს, სპა–ცენტრებს, ბაკურიანის გასართობებს).

„ტურ–ოპერატორებმა დიდი იმედი გამოთქვეს, რომ თავიანთ მომხმარებელს დააინტერესებენ ბორჯომის მუნიციპალიტეტში არსებული შეთავაზებებით და მომავალში გაიზრდება ტურისტთა და დამსვენებელთა წილი რუსეთის ფედერაციიდან ჩვენს მხარეში“, – აცხადებენ ბორჯომის მუნიციპალიტეტის გამგეობაში.

ინფოტურს ორგანიზება ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ გაუწია.

ტურიზმის ეროვნული ადმინისტრაციის ცნობით, ინფორტურის მიზანიქვეყანაში ტურისტული ნაკადების გაზრდაა. ტურის ფარგლებში რუსული კომპანიების წარმომადგენლები ქართველ კოლეგებს შეხვდნენ და ტურისტული პაკეტების შემუშავების გეგმები განიხილეს.

მათივე ინფორმაციით, საქართველოში საერთაშორისო მოგზაურთა ტოპ 10-ულში რუსეთის ფედერაცია მე-4 ადგილს იკავებს. 2015 წელს საქართველოს რუსეთიდან 925 ათასზე მეტი მოგზაური ეწვია, ზრდა 2014 წელთან შედარებით 14%-ით მეტია.

[ნინო ნარიმანიშვილი, ბორჯომი]