დეკემბრის ბოლოდან საქართველოში გრიპის ვირუსის შემთხვევების მატებას ვარაუდობენ

დაავადებათა კონტროლის ეროვნული ცენტრის სამეცნიერო საბჭოს ხელმძღვანელის განცხადებით, გასულ კვირას რესპირატორული ვირუსების დაავადების შემთხვევები თითქმის ყველა ასაკობრივ ჯგუფში დაფიქსირდა. განსაკუთრებით დაავადებულები იყვნენ 4 წლამდე ასაკის ბავშვები. პაატა იმნაძის თქმით, ამ დროისთვის რესპირატორული ინფექციებით დაავადების შემთხვევებმა იკლო, თუმცა შემდგომ პერიოდში, არ გამორიცხავს, რომ კვლავ მოიმატოს.

რაც შეეხება, გრიპის ვირუსის მატებას, როგორც პაატა იმნაძე ამბობს, დეკემბრის ბოლოდან დაფიქსირდება და იანვრისთვის შესაძლოა ჩაცხრეს: "ევროპის ქვეყნებში დაფიქსირდა გრიპის ვირუსით ინფიცირების შემთხვევები, კერძოდ, BH1N1 და H3N2 ვირუსები. წელსაც საქართველოში ამ ვირუსების ცირკულაცია მოხდება", - აღნიშნა პაატა იმნაძემ და მშობლებს მიმართა, რომ თუკი ბავშვს თუნდაც ერთი დღით 38 გრადუსი ტემპერტურა ექნება, ექიმს აუცილებლად მიმართონ, წინააღმდეგ შემთხვევაში, საჭირო გახდება მოზარდის სტაციონარში გადაყვანა და უფრო მეტი სამედიცინო ჩარევების განხორციელება.

ამასთან, იმნაძე მოსახლეობას მოუწოდებს ხშირად დაიბანონ ხელი და ნაკლებად იყვნენ დაავადებულ პირთან კონტაქტში, მის სიახლოვეს.

[sknews.ge]