საჭადრაკო სექცია პირობების გარეშე

ნინოწმინდაში ჭადრაკის სექცია 2008 წელს გაიხსნა, ადგილობრივი ბიუჯეტის დაფინანსებით. ამ ეტაპზე სექციაში 45 მოსწავლე და ერთი მასწავლებელია. ჭადრაკის მასწავლებელი იურა ქუიუმჩიანი ამბობს, რომ მსურველი კიდევ ბევრია, მაგრამ იძულებულნი არიან უარი უთხრან.

ჭადრაკის სექციას ერთი ოთახი აქვს დათმობილი. მოსწავლეებს მეცადინეობისთვის ნორმალური მაგიდები არ აქვთ. გარდა ამისა, 45 მოსწავლეზე მხოლოდ ერთი მასწავლებელია, რომელიც მეცადინეობების ჩატარებას უკვე ფიზიკურად ვეღარ ასწრებს.

ჭადრაკის მასწავლებელმა იურა ქუიუმჩიანმა სექციის გაფართოებისა და მისი სკოლად გადაკეთების თხოვნით ადგილობრივ ხელისუფლებას ბევრჯერ მიმართა, მაგრამ უშედეგოდ.

“იძულებული გავხდი, განცხადებაც კი დამეწერა, რომ განაცხადებს ვეღარ ვიღებთ, მოსწავლეების მიღება შევაჩერეთ. ახალქალაქში ჭადრაკის სექცია ჩვენი სექციის შემდეგ გაიხსნა და იქ უკვე საჭადრაკო სკოლაა. ჩვენც გვინდა სკოლა გვქონდეს, - ამბობს იურა ქუიუმჩიანი, - თუ სკოლა იქნება, მხოლოდ ერთი ჯგუფი მეყოლება. მეტი დაფინანსება იქნება და შევძლებ საჭადრაკო დაფების, მაგიდების, საათებისა და სხვა ინვენტარის ყიდვას. სკოლა თუ გაიხსნება, თავად გადავწყვეტ, რა შეჯიბრებზე წავიდე, ახლა კი იმ ასპარეზობებზე გვიწევს სიარული, სადაც გაგვიშვებენ”.

[შუშან შირინიანი, ნინოწმინდა]