ახალციხის პირველი სკოლა ჭადრაკის ჩემპიონი გახდა

ჭადრაკის ჩემპიონატი სკოლებს შორის გუშინ, 16 აპრილს დაიწყო, დღეს კი ფინალური შეხვედრა გაიმართა. ჩემპიონატში ექვსი სკოლა მონაწილეობდა. თითოეულმა სკოლამ 4-კაციანი ჯგუფი წარადგინა. ჩემპიონატის ფარგლებში ხუთი 20-წუთიანი ტური გაიმართა. ტურნირი ახალციხის კომპლექსურ სასპორტო სკოლაში გაიმართა.

გამარჯვება პირველი სკოლის ჯგუფმა მოიპოვა.

”ძალიან მიხარია, რომ ჩემმა სკოლამ გაიმარჯვა. მე პირადად, ერთადერთი გოგონა ვარ ჩემს ჯგუფში, ყველა ტური მოვიგე და ერთი ყაიმით დავამთავრე. ძალიან კარგი და საინტერესო ჰობი მაქვს”,- ამბობს პირველი საჯარო სკოლის მე-7 კლასის მოსწავლე ლილი ზაზაძე.

მეორე და მესამე ადგილები მე-5 და მე-6 სკოლამ გადაინაწილეს.
ჩემპიონატი ახალციხის მუნიციპალიტეტის გამგეობის ინიციატივითა და ხელშეწყობით გაიმართა.

კულტურის, განათლების, სპორტისა და ახალგაზრდულ საქმეთა სამსახურის უფროსის კახაბერ კოპაძის თქმით, ჭადრაკის ტურნირი კიდევ იგეგმება: ”გვინდა ჭადრაკის ჩემპიონატი სექტემბერში ღია ცის ქვეშაც გავმართოთ”.

ჩემპიონატის მთვარი მიზანი ქალაქის სკოლებში ჭადრაკის პოპულარიზაცია და ჩემპიონის გამოვლენა იყო. შეჯიბრის მთავარი მსაჯის შაქრო დიდიმამიშვილის თქმით, 20 აპრილს საქართველოს ჩემპიონატზე თბილისში აპირებენ წასვლას. ჩემპიონატზე ორი გუნდი გაემგზავრება.

[ნინო ზედგინიძე, ახალციხე]