განახლდება თუ არა პირველს საჯარო სკოლაში სასწავლო პროცესი 15 სექტემბერს

ახალციხის N1 საჯარო სკოლაში სარეაბილიტაციო სამუშაოები 12 იანვარს დაიწყო და 30 სექტემბერს უნდა დასრულდეს.

„ლესვა და კერამოგრანიტის მოწყობის სამუშაოები დასრულებულია. სამღებრო სამუშაოები სრულდება. ცეკვის, სპორტულ დარბაზში და საკლასო ოთახებში იწყება პარკეტის დაგება. დასრულებულია სველი წერტილები, მხოლოდ დასამონტაჟებელია ხელსაბანები და უნიტაზები“, – ამბობს მშენებელი კომპანიის „ინტერ პლიუსის“ფინანსური დირექტორი ლექსო მათოშვილი.

მისი თქმით, პარალელურად მიმდინარეობს ფასადზე სამღებრო სამუშაოები. შეცვლილია სახურავის ნაწილი და დაზიანებული ფანჯრები. ეზოში აშენდა ე.წ საქვაბე.

„15.000 კვ.მ კედლი გაილესა, შეიცვალა ფანჯრის რაფები და 135 კვ.მ მეტალოპლასტმასის ფანჯარა. ჯამში 2.000 კვ.მ სახურავი უნდა შეიცვალოს, ეს სამუშაოები თითქმის დასრულებულია“, – განმარტავს ლექსო მათოშვილი.

სარეაბილიტაციო სამუშაოებზე 85 ადგილობრივი ხელოსანი და დამხმარე მუშა მუშაობს.

მშენებელ კომპანიაში განგვიმარტეს, რომ ცენტრალური გათბობის და სავენტელაციო სამუშაოებისთვის სპეციალისტები თბილისიდან ჩამოიყვანეს.
ჯამში სარეაბილიტაციო სამუშაოებისთვის 395.000 ამერიკული დოლარი დაიხარჯება.

საქართველოს საჯარო სკოლებში სასწავლო პროცესი 15 სექტემბერს იწყება. რომელ სკოლაში დაიწყებენ სასწავლო პროცესს N1 საჯარო სკოლის მოსწავლეები, ჯერ გადაწყვეტილი არ არის.

სკოლის დირექტორის ჟუჟუნა გოგოლაურის განმატებით, ამ საკითხზე უახლოეს დღეებში იმსჯელებენ.

„ჯერ არ ვიცით, ხვალ თათბირი გვექნება და ალბათ გავიგებთ. შვებულებაში ვარ 15 დღეა“, – განაცხადა სატელეფონო საუბარში ჟუჟუნა გოგოლაურმა.

შეგახსენებთ, რომ გასულ სასწავლო წელს N1 საჯარო სკოლის 950 მოსწავლე N3 და N6 საჯარო სკოლებში იყვნენ გადანაწილებული.
N1 საჯარო სკოლის შენობის რეაბილიტაციას აშშ-ის ათასწლეულის გამოწვევის კორპორაცია (“Millennium Challenge Corporation- MCC”) აფინანსებს. ტენდერში გამარჯვებულ კომპანიასთან ხელშეკრულებას 19 ნოემბერს მოეწერა ხელი.







[თინათინ ზაზაძე, ახალციხე]