ახალციხეში მიხეილ თამარაშვილის ძეგლს დადგამენ

ქართველი მეცნიერისა და საზოგადო მოღვაწის მიხეილ თამარაშვილის სახელობის სკვერის მოწყობას ახალციხის მერია თამარაშვილის ქუჩაზე, იუსტიციის სახლის მიმდებარე ტერიტორიაზე გეგმავს.

ახალციხის მერის, გიორგი კოპაძის განცხადებით, ასევე იგეგმება მიხეილ თამარაშვილის ძეგლის გაკეთებაც: „ზუსტად არ ვიცით ეს წელს მოესწრება თუ მომავალი წლისთვის, მაგრამ გავაკეთებთ აუცილებლად“.

სკვერისა და ძეგლის მოსაწყობად, თანხა 2014 წლის ადგილობრივ ბიუჯეტში იყო გაწერილი, თუმცა როგროც ახალციხის მერი ამბობს, მცირე ოდენობის გამო პროექტის განხორციელება არ ღირდა: „ჩვენი ღირსეული მამულიშვილისთვის უფრო უკეთესი პროექტი უნდა განხორციელდეს“.

როგორც ახალციხის მუნიციპალიტეტის საკრებულოს მაშინდელი თავმჯდომარე ოლეგ სანდროშვილი აცხადებს, 2014 წელს ძეგლის ესკიზებიც კი განიხილეს, თუმცა პროექტის ბოლომდე განხორციელება ვერ მოესწრო, არჩევნები მოვიდა და თვითმმართველობა შეიცვალა.

„სადაც ახლა პატარა სკვერია თამარშვილის ქუჩაზე, იქ ვგეგმავდით ძეგლის დადგმასაც“, – ამბობს სანდროშვილი.

გარდა თამარაშვილის ძეგლისა, ახალციხის ადგილობრივი თვიმმართველობა ქვეყნის თავისუფლებისათვის შეწირულთა მემორიალისა და ასევე, ბექა ჯაყელის ძეგლის გაკეთებას გეგმავს.

„ბექა ჯაყელის ძეგლზე როცა კონკურსი გამოვაცხადეთ, ისეთი დონის ესკიზები შემოვიდა, რომ შესყიდვა არ ღირდა და მაშინდელმა კომისიამ ყველა დაიწუნა. ამიტომ ასეთი საქმისთვის თანხა არ უნდა დავიშუროთ და თუნდაც თბილისიდან ღირსეული მოქანდაკეები ჩამოვიყვანოთ“, – ამბობს გიორგი კოპაძე.

[თამუნა უჩიძე, ახალციხე]